तालुका अध्यक्ष भास्कर परब यांनी दिली माहिती
*💫कुडाळ-:* सांगिर्डे येथील इमारत च्या अपहारप्रकरणी २१ नोव्हेंबरपर्यंत निर्णय देण्याची मागणी करूनही अद्याप याबाबत निर्णय न दिल्याने राष्ट्रवादी काँग्रेस पक्षाच्या माध्यमातून उद्या सोमवार २३ नोव्हेंबर रोजी सकाळी १० वाजता कुडाळ प्रांत कार्यालय येथे घंटानाद आंदोलन करण्यात येणार असल्याची माहिती राष्ट्रवादी काँग्रेसचे कुडाळ तालुका अध्यक्ष भास्कर परब यांनी दिली. नॅशनल हायवेच्या संपादन प्रक्रियेत सांगिर्डे येथील इमारतच्या अपहार प्रकरणी राष्ट्रवादी काँग्रेसच्या माध्यमातून या इमारतीचा हायवे संपादित प्रकियेत काहीही संबंध नसताना ही इमारत संपादित दाखवून लाखो रूपयांच्या शासकीय निधीचा अपहार केला आहे. या अपहार प्रकरणात जे जबाबदार असतील त्यांची चौकशी करून संबंधितांवर कारवाई करावी व खोटी संपादन प्रक्रिया करून मांगीलाल परमार यांना इमारत साठी दिलेली रक्कम वसूल करण्यात यावी यासाठी गेले तीन चार महिन्यांपासून मागणी करूनही प्रांत कार्यालय व जिल्हाधिकारी कार्यालय यांच्याकडून अपेक्षित सहकार्य मिळत नाही. तसेच संबंधितांना या प्रकरणातून वाचविण्याचा प्रयत्न केला जात असल्याचे निदर्शनास येत आहे. त्यासाठी २१ नोव्हेंबरपर्यंत निर्णय देण्याची मागणी करूनही अद्याप याबाबत निर्णय न दिल्याने त्यामुळे पक्षाच्या माध्यमातून घोषित केल्याप्रमाणे सोमवार २३ नोव्हेंबर रोजी सकाळी १० वाजल्यापासून कुडाळ प्रांत कार्यालय येथे घंटानाद आंदोलन सुरू करण्यात येणार आहे. त्यासाठी राष्ट्रवादी काँग्रेसच्या सर्व पदाधिकारी व कार्यकर्त्यांनी वेळीच उपस्थित राहून हे आंदोलन यशस्वी करावयाचे आहे, असे आवाहन भास्कर परब, ओबीसी जिल्हाध्यक्ष बाळासाहेब कनयाळकर यांनी केले आहे.
