विशाल परब यांच्या नियोजनाचे दीपक केसरकरांकडून कौतुक:
देशभक्तीच्या जयघोषात हजारो कार्यकर्त्यांचा सहभाग; राजकीय मतभेद बाजूला ठेवत तिरंग्यासाठी नेते एकत्र..
⚡सावंतवाडी ता.१०-: स्वातंत्र्यदिनाच्या पार्श्वभूमीवर सावंतवाडी विधानसभा मतदारसंघाच्या वतीने आयोजित करण्यात आलेल्या भव्य तिरंगा रॅलीने शहरात देशभक्तीचा उत्साह संचारला. हातात तिरंगा आणि ‘भारत माता की जय’च्या जयघोषात हजारो कार्यकर्ते रॅलीत सहभागी झाले. संपूर्ण सावंतवाडी शहर तिरंगामय झाल्याचे चित्र यावेळी पाहायला मिळाले.
या रॅलीचे विशेष आकर्षण ठरले ते माजी मंत्री तथा आमदार दीपक केसरकर आणि भाजपचे युवा नेते विशाल परब यांची एकाच व्यासपीठावरील उपस्थिती. राजकीयदृष्ट्या वेगवेगळ्या भूमिकांमध्ये असलेल्या दोन्ही नेत्यांनी देशभक्तीच्या भावनेतून एकत्र सहभाग नोंदवला.
रॅलीच्या उत्कृष्ट नियोजनाबद्दल आमदार दीपक केसरकर यांनी भाजप युवा नेते विशाल परब यांचे विशेष कौतुक केले. रॅलीच्या आयोजनासाठी घेतलेली मेहनत, कार्यकर्त्यांना मोठ्या संख्येने एकत्रित करण्यासाठी केलेले नियोजन आणि कार्यक्रम यशस्वी करण्यासाठी घेतलेले परिश्रम याबद्दल केसरकर यांनी विशाल परब यांचे आभार मानत त्यांच्या नियोजनाचे कौतुक केले.
या रॅलीला पालकमंत्री नीतेश राणे, आमदार दीपक केसरकर, भाजप युवा नेते विशाल परब, भाजप जिल्हाध्यक्ष प्रभाकर परब, जिल्हा महिला आघाडी प्रमुख श्वेता कोरगावकर, जिल्हा परिषद सदस्य संदीप गावडे, नगराध्यक्ष श्रद्धाराजे भोसले, उपनगराध्यक्ष अनिल निरवडेकर यांच्यासह भाजपचे पदाधिकारी, लोकप्रतिनिधी आणि कार्यकर्ते मोठ्या संख्येने उपस्थित होते.
विशाल परब यांच्याकडे भाजपच्या युवा नेतृत्वाची जबाबदारी अधिक ठळक होत असताना, एवढ्या मोठ्या तिरंगा रॅलीचे प्रभावी नियोजन करून त्यांनी पुन्हा एकदा आपली संघटन क्षमता दाखवून दिल्याची चर्चा सावंतवाडीच्या राजकीय वर्तुळात सुरू झाली आहे. कार्यकर्त्यांना मोठ्या संख्येने एकत्र आणणे, रॅलीचे नियोजनबद्ध आयोजन करणे आणि संपूर्ण कार्यक्रमाला देशभक्तीचा रंग देण्यात विशाल परब यांची भूमिका महत्त्वाची ठरल्याचे कार्यकर्त्यांकडून सांगण्यात आले.
विशेष म्हणजे, राजकीय मतभेद बाजूला ठेवून देशभक्तीच्या मुद्द्यावर एकत्र आलेले दीपक केसरकर आणि विशाल परब यांची उपस्थितीही चर्चेचा विषय ठरली. तिरंग्याच्या साक्षीने राजकीय मतभेदांपलीकडे जाऊन देशासाठी एकत्र येण्याचा संदेश या रॅलीतून देण्यात आला.
रॅलीतील उत्स्फूर्त सहभाग, तिरंग्याची दिमाखदार उपस्थिती, कार्यकर्त्यांचा उत्साह आणि विशाल परब यांच्या नियोजनाचे दीपक केसरकर यांनी केलेले कौतुक यामुळे सावंतवाडीतील ही तिरंगा रॅली विशेष चर्चेत राहिली. या निमित्ताने भाजपच्या युवा नेतृत्वाची ताकद आणि विशाल परब यांच्या वाढत्या संघटनात्मक प्रभावाची झलक पाहायला मिळाल्याची चर्चा राजकीय वर्तुळात रंगली आहे.
