विरुद्ध दिशेने आलेल्या दुचाकीमुळे दुर्घटना..
⚡कुडाळ ता.१९-: मुंबई-गोवा महामार्गावर कुडाळ नजीक वेताळबांबर्डे येथे आज दुचाकी आणि चारचाकी कारचा भीषण अपघात झाला. महामार्गावर विरुद्ध दिशेने आलेल्या दुचाकीमुळे हा अपघात घडल्याचे प्रथमदर्शनी समोर आले असून, यामध्ये दोन युवक जखमी झाले आहेत.
मिळालेल्या माहितीनुसार, होंडा अमेझ कार (MH 05 EQ 6515) ही कुडाळच्या दिशेने जात होती. याच वेळी हिरो एचएफ डिलक्स (MH 07 V 2198) या दुचाकीवरून दोन युवक महामार्गावर विरुद्ध दिशेने आले. अचानक समोरून दुचाकी आल्याने कार चालकाला नियंत्रण मिळवणे कठीण झाले आणि दोन्ही वाहनांची जोरात धडक झाली.
या अपघातात दुचाकीवरील दोन युवक जखमी झाले असून, त्यांना तातडीने उपचारासाठी रुग्णालयात दाखल करण्यात आले आहे. या धडकेत होंडा अमेझ कारच्या पुढच्या भागाचे मोठ्या प्रमाणात नुकसान झाले आहे. सुदैवाने कार चालकाला गंभीर इजा झालेली नाही.
अपघात घडल्यानंतर घटनास्थळी लोकांची मोठी गर्दी जमली होती. प्रत्यक्षदर्शींनी दिलेल्या माहितीनुसार, दुचाकी चालवणारे युवक मद्यधुंद अवस्थेत गाडी चालवत असावेत, अशी जोरदार चर्चा घटनास्थळी सुरू होती. विरुद्ध दिशेने गाडी चालवणे आणि त्यात मद्यप्राशन केल्याचा संशय असल्याने नागरिकांनी संताप व्यक्त केला. महामार्गावर विरुद्ध दिशेने वाहन चालवणे हे स्वतःच्या आणि इतरांच्या जीवावर बेतू शकते. वाहतूक नियमांचे पालन करण्याचे आवाहन प्रशासनाकडून करण्यात येत आहे.
