सावंतवाडी, प्रतिनिधी जिल्ह्यातील सर्वाधिक रुग्णसंख्या असलेल्या सावंतवाडी उपजिल्हा रुग्णालयातील जुन्या आणि नव्या इमारतीमधील स्वच्छतागृहांच्या दुरुस्तीसाठी प्रत्येकी सात लाख, असे एकूण १४ लाख रुपयांचा निधी मंजूर करण्यात आला आहे. राज्याचे बंदर व मत्स्य विभाग मंत्री तथा सिंधुदुर्ग जिल्ह्याचे पालकमंत्री नितेश राणे यांनी तातडीने या निधीला मंजुरी दिली असून, सिंधुदुर्ग जिल्हा बँकेचे अध्यक्ष मनीष दळवी यांनी यासाठी विशेष प्रयत्न केले.
सावंतवाडी उपजिल्हा रुग्णालयाच्या ब्रिटिशकालीन इमारतीमधील स्वच्छतागृहांची मोठ्या प्रमाणात दुरावस्था झाली होती. त्यांची दुरुस्ती करण्यासाठी सात लाख रुपयांच्या निधीची आवश्यकता होती. यासाठी जिल्हा शल्य चिकित्सक डॉ.श्रीपाद पाटील आणि उपजिल्हा रुग्णालयाचे वैद्यकीय अधीक्षक डॉ. ज्ञानेश्वर ऐवळे यांनी सार्वजनिक बांधकाम विभागाच्या अंदाजित खर्चासह जिल्हा नियोजन अधिकारी श्री बुधावले यांच्या कडे मागणीपत्र सादर केले होते. त्याचबरोबर, रुग्णालयाच्या नवीन इमारतीमधील स्वच्छतागृहांच्या दुरुस्तीसाठीही सात लाख रुपयांचा निधी असा मिळून एकूण 14 लाख रुपयांच्या निधीची याच वेळी मागणी करण्यात आली होती.
पालकमंत्री नितेश राणे यांनी रुग्णालयाचे काम तातडीने पूर्ण करण्याच्या सूचना दिल्या, तर जिल्हा बँकेचे अध्यक्ष मनीष दळवी यांनी सार्वजनिक बांधकाम विभागाचे कार्यकारी अभियंता महेंद्र किणी यांना हे काम त्वरित हाती घेण्याचे आदेश दिले. त्यामुळे स्वच्छतागृहांच्या दुरुस्तीसाठी १४ लाखांचा निधी तत्काळ मंजूर झाला असून, या कामाला गती मिळाली आहे.
उपजिल्हा रुग्णालयात येणाऱ्या आंतररुग्ण आणि बाह्यरुग्णांना या दोन्ही स्वच्छतागृहांमुळे मोठा फायदा होणार आहे. याव्यतिरिक्त, गरोदर आणि बाळंतिण महिलांसाठी रुग्णालयात दानशूरांच्या मदतीने गिझरची सोय उपलब्ध करून देण्यात आली आहे, ज्यामुळे त्यांना गरम पाण्याचे स्नान करणे शक्य झाले आहे. सामाजिक बांधिलकी प्रतिष्ठानने यासाठी गिझर बसवले आहेत.
स्वच्छतागृहांच्या दुरुस्तीचे काम सुरू असून, पालकमंत्री नितेश राणे आणि जिल्हा बँकेचे अध्यक्ष मनीष दळवी यांनी दाखवलेल्या तत्परतेबद्दल रुग्ण आणि त्यांच्या नातेवाईकांकडून समाधान व्यक्त होत आहे.
