सुमारे दोन लाखांपेक्षा अधिक किंमतीची यंत्र सामग्रीची चोरी..
⚡मालवण ता.०५-: आडवली भटवाडी येथील दुर्गा प्रसाद गजानन तुळपुळे यांच्या चिरेखाणीवरील सुमारे २ लाख १६ हजार ५०० रुपयांची यंत्र सामग्री अज्ञात चोरट्याने चोरुन नेण्याची घटना गुरुवारी ४ जुलै रोजी उघडकीस आली. याबाबत अज्ञाताविरोधात आचरा पोलीस ठाण्यात गुन्हा दाखल करण्यात आला आहे.
आचरा पोलीस स्टेशनला दुर्गा प्रसाद तुळपुळे यांनी दिलेल्या तक्रारीत म्हटले आहे की, पावसाळा हंगाम सुरू असल्याने जून महिन्यापासूनच चिरेखाण व्यवसाय बंद आहे. त्यामुळे आवश्यक ती यंत्र सामग्री चिरेखाणी लगत पत्र्याच्या शेडमध्ये ठेवण्यात आली होती. गुरुवारी चार जुलै रोजी नेहमीप्रमाणे सकाळी पुजेसाठी फुले काढायला गेलो असता. शेडला दक्षिण बाजूने लावलेले २५ ते ३० चिरे कुणीतरी अज्ञाताने काढलेले आढळून आले. याबाबत संशय आला म्हणून पहाणी केली असता पाॅवर टिलर, तीन कटींग मोटार ,तीन वायर बंडल , दोन कटींग ब्लेड, दोन डंपर स्टेपनी, स्क्रू ड्रायव्हर, आदी साहित्य, तसेच इण्डेन गॅस सिलिंडर आदी माल चोरीस गेला.
याबाबत घटनेची खबर मिळताच आचरा पोलीस स्टेशनचे सहाय्यक पोलीस निरीक्षक अनिल व्हटकर, सहा. पोलीस उपनिरीक्षक महेश देसाई, पोलीस हवालदार मिलिंद परब,बाळू कांबळे यांनी घटनास्थळी भेट देऊन घटनेचा पंचनामा केला . अधिक तपास सपोनी अनिल व्हटकर यांच्या मार्गदर्शनाखाली सुरू आहे.
