शिष्यवृत्ती परीक्षेत मिळविले यश
बांदा/प्रतिनिधी
फेब्रुवारी २०२३ मध्ये झालेल्या इयत्ता पाचवी शिष्यवृत्ती परीक्षेत न्यू इंग्लिश स्कूल मडुरा प्रशालेची स्वरा संदीप निऊंगरे २५२ गुण (८४ टक्के) गुणांसह सर्वसाधारण ग्रामीण विभागात सिंधुदुर्ग जिल्ह्यात प्रथम येण्याचा सन्मान प्राप्त केला आहे. तिच्या यशामुळे मडुरा हायस्कूलच्या शिरपेचात आणखी एक मानाचा तुरा रोवला गेला आहे.
स्वराचे व तिच्या पालकांचे धी बांदा नवभारत शिक्षण प्रसारक मंडळ मुंबईचे पदाधिकारी, समन्वय समिती सदस्य, पंचक्रोशीतील सरपंच, पालक- ग्रामस्थ, मुख्याध्यापक सुहास वराडकर, सर्व शिक्षक- शिक्षकेतर कर्मचारी व विद्यार्थी यांच्याकडून कौतुक होत आहे. स्वरा निऊंगरे हिने या अगोदर वक्तृत्व स्पर्धा, महाराष्ट्र राज्य गणित अध्यापक महासंघातर्फे घेण्यात येणारी गणित प्रज्ञा परीक्षा व विविध बाह्य परीक्षांमध्ये यश संपादन केलेले आहे.
