नांदगाव परिसरात अपघातांची मालिका सुरूच
कणकवली 14 जून (प्रतिनिधी)-मुंबई गोवा महामार्गावर अपघातांची मालिका सुरूच असून पहाटे ३ वा.च्या दरम्यान नांदगाव ओटव फाटा ब्रिज वर थांबलेल्या वाहनाला अज्ञात वाहनाने ठोकरल्याने एक जण गंभीर जखमी झाला असून चार जण किरकोळ जखमी झाले आहेत.
याबाबत अधिक माहिती अशी की, गोव्याहून मुंबईच्या दिशेने जाणारी इको कार नांदगाव ओटव फाटा ब्रिजवर आली असता पेट्रोल संपले म्हणून बाजूला थांबली असता मागाहून येणा-या अज्ञात वाहनाने जोरदार ठोकरल्याने अपघात झाला आहे. या अपघातात एक जण गंभीर जखमी झाला असून तर चार जण किरकोळ जखमी झाले आहेत.जखमींना नांदगाव रुग्णवाहिकेतून व काहींना १०८ रुग्ण वाहीकेमधून रुग्णालयात दाखल करण्यात आले आहे.
नांदगाव हायवे संदर्भात सर्व्हिस रोडचा प्रश्न अद्याप सुटलेला नाही ओटव फाटा ब्रिज जवळील रस्त्याचा प्रश्न सुटला असला तरी नांदगाव तिठा येथील सर्व्हिस रोड चा प्रश्न अद्याप जैसे थे आहे.कित्येक अपघात हे सर्व्हिस रोड अभावी होताना दिसत आहे.
अपघाताची माहिती मिळताच स्थानिक ग्रामस्थ व सामाजिक कार्यकर्ते भाई मोरजकर,दिपक मोरजकर ,संकेत बिडये भुपेश मोरजकर ,प्रतिक भाट आदींनी धाव घेऊन मदतकार्य केले.
