निकटवर्ती कार्यकर्त्यावर हल्ला झाल्यानंतर पोलिसांकडून खबरदारी
*⚡कणकवली ता.१९-:* जिल्हा बॅंकेचे अध्यक्ष सतीश सावंत यांच्या प्रचाराची धुरा सांभाळणारे शिवसेना कार्यकर्ते संतोष परब यांच्यावर जीवघेणा हल्ला झाल्यानंतर पोलिसांकडून सतीश सावंत यांना दोन पोलिसांचे पोलिस संरक्षण देण्यात आले आहे. येत्या काळात जिल्हा बँकेची निवडणूक होऊ घातलेली असतानाच सतीश सावंत हे जिल्हा बँकेचे उमेदवार आहेत. या पार्श्वभूमीवर सावंत यांच्या निकटवर्तीय कार्यकर्त्यावर हल्ला झाल्याने पोलिसांनी खबरदारीच्या उपाययोजना म्हणून तातडीने सतीश सावंत यांना दोन पोलिसांचे संरक्षण दिले आहे. भाजपाच्या शिष्टमंडळाने देखील काल पोलीस निरीक्षकांकडे सतीश सावंत यांना जिल्हा बँक निवडणूक होईपर्यंत पोलिस संरक्षण द्या अशी मागणी केली होती.
