⚡बांदा ता.०७-: दहीहंडीचा उत्साह, गोविंदांचा जल्लोष आणि हंडी फोडण्याची लगबग… या पारंपरिक उत्सवाला वाचनसंस्कृतीची अनोखी जोड देत जिल्हा परिषद प्राथमिक शाळा घारपी येथे विद्यार्थ्यांनी ‘पुस्तकांची हंडी’ साजरी केली. हंडी फुटताच दही-दुधाऐवजी विद्यार्थ्यांच्या हाती आली ती ज्ञानाची अमूल्य शिदोरी—रंगीबेरंगी पुस्तके!
सण-उत्सवांच्या माध्यमातून विद्यार्थ्यांना आनंददायी शिक्षणाचा अनुभव मिळावा, त्यांच्या मनात वाचनाची आवड निर्माण व्हावी आणि ‘पुस्तक हेच खरे मित्र’ ही भावना रुजावी, या सुंदर उद्देशाने ‘पुस्तकांची हंडी’ हा अभिनव उपक्रम आयोजित करण्यात आला.
आकर्षक पद्धतीने सजविण्यात आलेल्या हंडीमध्ये विविध बालसाहित्य, गोष्टींची पुस्तके, चित्रकथा तसेच ज्ञानवर्धक वाचनसाहित्य ठेवण्यात आले होते. हंडी फोडण्यासाठी विद्यार्थ्यांमध्ये कमालीचा उत्साह संचारला होता.
मोबाईल आणि डिजिटल माध्यमांच्या वाढत्या वापराच्या काळात विद्यार्थ्यांच्या हातात मोबाईलऐवजी पुस्तक यावे, डोळ्यांसमोर स्क्रीनऐवजी पुस्तकाची पाने खुलावीत आणि वाचनातून विचारांची नवी दालने उघडावीत, हा या उपक्रमामागील प्रेरणादायी संदेश होता.
दहीहंडीच्या उत्साहाला वाचनसंस्कृतीची जोड देत घारपी शाळेने ‘सण साजरा करा, पण त्यातून संस्कारही रुजवा’ असा सुंदर संदेश दिला. त्यामुळे ‘पुस्तकांची हंडी’ हा उपक्रम विद्यार्थ्यांसाठी केवळ मनोरंजनाचा क्षण न ठरता ज्ञान, आनंद आणि वाचनप्रेमाची अविस्मरणीय पर्वणी ठरला.
या उपक्रमाच्या यशस्वी आयोजनासाठी मुख्याध्यापक जे.डी. पाटील, सहकारी शिक्षक आशिष तांदुळे व धर्मराज खंडागळे, अंगणवाडी सेविका संजना गावकर व अमृता कविटकर तसेच स्वयंपाकी मदतनीस संचिता सावंत यांनी विशेष परिश्रम घेतले. त्यांच्या नियोजनबद्ध प्रयत्नांमुळे विद्यार्थ्यांचा उत्साह द्विगुणित झाला आणि ‘पुस्तकांची हंडी’ घारपी शाळेच्या शैक्षणिक उपक्रमांमध्ये एक आगळावेगळा आणि प्रेरणादायी ठसा उमटवून गेली.
घारपी शाळेत विद्यार्थ्यांनी साजरी केली ‘पुस्तकांची हंडी’…
