प्रवासी थोडक्यात बचावले: तात्काळ बंदोबस्त करा, अन्यथा आम्हाला वेगळा मार्ग स्वीकारावा लागेल, माजगाव ग्रामस्थांचा इशारा
⚡सावंतवाडी ता.२२-: : माजगाव परिसरात आज सकाळी सिक्स सीटर चालक लव पेडणेकर यांच्या वाहनाला गवा-रेड्याने जोरदार धडक दिल्याची घटना घडली. या अपघातात कोणतीही जीवितहानी झाली नसली तरी वाहनाचे नुकसान झाले आहे.
गेल्या काही दिवसांत या भागात गवा-रेडे रस्त्यावर येण्याच्या घटनांत वाढ झाली असून यामुळे सतत अपघाताचा धोका निर्माण झाला आहे. वारंवार घडत असलेल्या घटनांमुळे ग्रामस्थांमध्येही भीतीचे वातावरण आहे.
याच पार्श्वभूमीवर उपसरपंच संतोष वझरे व संजय कांसे यांनी वनविभागाला तातडीने गवा-रेड्यांचा बंदोबस्त करण्याचे आवाहन केले आहे. “अपघात रोखण्यासाठी योग्य त्या उपाययोजना केल्या नाहीत तर आम्हाला वेगळा मार्ग स्वीकारावा लागेल,” असा स्पष्ट इशारा त्यांनी वनविभागाला दिला आहे.स्थानिक ग्रामस्थांनीही या परिसरात गवा-रेड्यांच्या वावरावर नियंत्रण आणण्यासाठी त्वरित कारवाईची मागणी केली आहे.
