कणकवली ः हुंबरट-फोंडा मार्गावरून चालणारे पादचारी बाबू कृष्णा जाधव (६०, रा. करुळ- गोपाळवाडी) यांना कारची धडक देऊन जखमी केले. याप्रकरणी चालक राकेश माणिक शिंदे (रा. खोतवाडी-मिरज, सांगली) याच्याविरोधात कणकवली पोलीस ठाण्यात गुन्हा दाखल झाला आहे. राकेश शिंदे आपल्या ताब्यातील बोलेरो पिकअप (एम. एच. १० सी. आर ७३६४) हुंबरटहून कोल्हापूरच्या दिशेने जात असताना पादचारी बाबू जाधव यांना धडक दिली. यात जाधव हे जखमी झाले होते. हा अपघात हुंबरट- फोंडामार्गावरील करुळ-घोरपेवाडी येथे बुधवारी सायंकाळी ६.३० वाजण्याच्या सुमारास घडला होता. अपघातग्रस्त जाधव यांना ग्रामस्थांनी येथील उपजिल्हा रुग्णालयात दाखल केले होते. अपघाताची माहिती मिळताच पोलिसांनी घटनास्थळी धाव घेतली. त्यानंतर जाधव यांना धडक दिलेली कार पोलिसांनी ताब्यात घेतली होती. या अपघाताबाबत सत्यवान धोंडू जाधव (४० रा. करुळ-गोपाळवाडी) यांनी फिर्याद दिली. त्यानुसार राकेश याच्या विरोधात गुन्हा दाखल झाला आहे. याबाबत तपास कणकवली पोलीस करीत आहेत.
अपघातप्रकरणी चालकावर गुन्हा दाखल…
