जलद बचाव पथकाने स्थानिकाच्या मदतीने पकडले..
कुडाळ : मुंबई गोवा महामार्गावर बिबवणे येथे शनिवारी मध्यरात्री एक मोठी मगर महामार्गावरून पलीकडे जात असताना बिबवणे येथील तरुणांना दिसली. त्यांनी सतर्कता दाखवून ते मगरीच्या मागावर राहिले. सर्व्हिस मार्गाकडील लोखंडी रिलिंगमुळे ती मगर पुढे न जाता साधारण पाऊण तास तेथेच थांबली. तरुणही तिच्यावर नजर ठेवून होते. सात फूट लांबीची ही मगर मोकळ्या जागेत असल्याने तिला पकडणे जिकिरीचे होते. अखेर वनविभागाच्या जलद बचाव कृती दलाने स्थानिक तरुणाच्या मदतीने त्या मगरीला शिताफीने पकडले. या पथकातील सदस्यांचे कौशल्य व स्थानिक तरुणाचे सहकार्य यामुळेच मगरीला पकडण्यात यश आले.
शनिवारी मध्यरात्री सव्वादोन वाजण्याच्या सुमारास बिबवणे गावातील प्रसाद निर्गुण, पिंट्या डेगवेकर ,केदार प्रभू व सत्यवान बिर्जे कारमधून मुंबई गोवा महामार्गावरून बांदाहून बिबवणेच्या दिशेने येत होते. याच दरम्यान, बिबवणे हायस्कूलपासून काही अंतर अलीकडे महामार्गावरून पलीकडे एक मोठी मगर जात असताना या तरुणाना दिसली. त्यांच्या कारच्या समोर ती अचानक आली. मात्र,सुदैवाने अनर्थ टळला.
महामार्ग ओलांडून ती मगर काहीशा वेगात पलीकडे गेली. या तरुणांनी लागलीच कार थांबविली आणि त्या मगरीच्या दिशेने धाव घेतली. मगर कर्ली नदीच्या दिशेने जाण्याच्या तयारीत होती परंतु सर्व्हिस मार्गावरील रेलिंगमुळे तिला पुढे जाणे शक्य झाले नाही. ती त्याच ठिकाणी थांबली आणि ते तरुण तिच्यावर पाळत ठेवून राहिल्याने ती काहीशी दचकून होती. त्या तरुणांनी गावातील अन्य तरुणाना याची कल्पना दिली. महामार्गावरून जाणारे प्रवासी तेथे थांबू लागले. तेथे गर्दी आणि काहीसे गजबजलेले वातावरण असल्याने मगर त्याच ठिकाणी राहिली. काही वेळा हालचाल करून तेथून जाण्याचा तिचा प्रयत्न होता. मात्र, तरुणांनी तिला काहीशा अंतरावर राहून घेरले होते.
दरम्यान कुडाळ वनविभागाला याबाबत कल्पना दिल्यानंतर वनविभागाचे जलद बचाव कृती पथक तात्काळ त्या ठिकाणी दाखल झाले. मोकळ्या जागेत मगर असल्याने तिला पकडणे मोठे धाडस त्यांच्या समोर होते. तिला पकडण्यासाठी जलद बचाव कृती पथकाने स्थानिक तरुणांच्या मदतीने प्रयत्न सुरू केले.अखेर या पथकातील वैभव अमृस्कर, अनिल गावडे व सुशांत करंगुटकर तसेच उपवनसंरक्षक कार्यालयातील (सावंतवाडी ) वाहनचालक कमलेश वेंगुर्लेकर यांनी स्थानिक प्रसाद निर्गुण, यशवंत (दादा)चव्हाण , पिंट्या डेगवेकर, केदार प्रभू,सत्यवान बिर्जे , पिंट्या कुडपकर,वैभव चव्हाण व अन्य तरुणांच्या मदतीने अतिशय शिताफीने त्या मगरीला पकडले. यासाठी तेरसेबांबर्डे येथील विजय खानोलकर यांचेही सहकार्य लाभले.
कुडाळ पोलीस ठाण्याला माहिती मिळताच सहायक पोलीस निरीक्षक जयदीप पाटील, हवालदार रत्नकांत तिवरेकर व हरेश पाटील तेथे दाखल झाले. दरम्यान, त्या मगरीला पहाटेच्या सुमारास नैसर्गिक अधिवासात सोडण्यात आले.
