विशेष सर्वसाधारण सभेनंतर महिला पदाधिकारी व सदस्यांचा उत्साह; अध्यक्षांच्या दालनाबाहेर पारंपरिक नृत्याने नवरात्रोत्सवाचा जल्लोष..
सिंधुदुर्गनगरी ता १९ नवरात्रोत्सवाच्या उत्साहाने सर्वत्र भक्तिमय आणि आनंदमय वातावरण निर्माण झाले असताना सिंधुदुर्ग जिल्हा परिषदेतही या उत्सवाचा रंग पाहायला मिळाला. जिल्हा परिषदेची विशेष सर्वसाधारण सभा संपन्न झाल्यानंतर महिला पदाधिकारी आणि सदस्यांनी एकत्र येत गरबा नृत्याचा फेर धरला. पारंपरिक फुगड्या घालत त्यांनी नवरात्रोत्सवाचा आनंद लुटला. दैनंदिन प्रशासकीय कामकाज आणि सभेतील चर्चेच्या वातावरणातून काही क्षण बाजूला होत महिला सदस्यांनी उत्साहाने सण साजरा केला.
सिंधुदुर्ग जिल्हा परिषदेच्या छत्रपती शिवाजी महाराज सभागृहात विशेष सर्वसाधारण सभा पार पडली. सभेचे कामकाज संपल्यानंतर जिल्हा परिषद अध्यक्षांच्या दालनाबाहेर महिला पदाधिकारी आणि सदस्य एकत्र आल्या. नवरात्रोत्सवानिमित्त त्यांनी गरबा नृत्य सादर केले, तर पारंपरिक फुगड्यांच्या माध्यमातून आनंदाची देवाणघेवाण केली. या उपक्रमामुळे जिल्हा परिषद परिसरात उत्सवी वातावरण निर्माण झाले.
या गरबा आणि फुगडीच्या फेरात महिला व बालविकास समिती सभापती अनुराधा नारकर, समाजकल्याण समिती सभापती रुहिता तांबे, अतिरिक्त मुख्य कार्यकारी अधिकारी शीतल पुंड, जिल्हा परिषद सदस्य दीपलक्ष्मी पडते, सुप्रिया वालावलकर, सुजाता पडवळ, सावी लोके, प्राची नाईक, सुयोगी घाडी, हर्षदा वाळके, सुप्रिया मेस्त्री, अवनी तेली आणि आरती पाटील यांच्यासह अन्य महिला सदस्य सहभागी झाल्या होत्या.
नवरात्रोत्सव हा शक्ती, भक्ती आणि स्त्रीशक्तीच्या पूजनाचा उत्सव मानला जातो. या पार्श्वभूमीवर विविध जबाबदाऱ्या सांभाळणाऱ्या महिला पदाधिकारी, अधिकारी आणि सदस्यांनी एकत्र येत पारंपरिक नृत्याचा आनंद घेतला. गरबा आणि फुगड्यांच्या माध्यमातून त्यांनी सणाचा उत्साह अनुभवला. जिल्हा परिषदेतील या आनंदी क्षणांमुळे महिला सदस्यांमधील स्नेहभाव आणि उत्सवी वातावरणाचे दर्शन घडले.