⚡मालवण ता.१८-: स्थानिक ग्रामस्थ श्री. सुभाष तळवडेकर यांनी परिमंडळ मालवण, नियतक्षेत्र धामापूर, राठीवडे (भाकरदेव) नजीकच्या मालकी जंगल भागात एक बिबट्या फासकीत अडकल्याची माहिती वनविभागाला दिल्यानंतर वनविभागाचे पथक तात्काळ घटनास्थळी दाखल झाले. वनअधिकारी, जलद बचाव पथक आणि स्थानिक ग्रामस्थ यांच्या मदतीने सदर बिबट्याची सुरक्षित सुटका करण्यात आली.
घटनास्थळी दाखल झालेल्या पथकाने दक्षतेने काम करत बिबट्याला फासकीतून मुक्त केले आणि त्याला पिंजऱ्यात सुरक्षित केले. पशुवैद्यकीय अधिकाऱ्यांनी बिबट्याची तपासणी केली असता तो पूर्णपणे सुस्थितीत असल्याचे निदर्शनास आले. त्यानंतर त्याला पुन्हा नैसर्गिक अधिवासात सोडण्यात आले.
वनविभागाने माहिती दिली की, बिबट्या हा अन्नसाखळीतील अत्यंत महत्त्वाचा घटक असून भारतीय वन्यजीव संरक्षण अधिनियम 1972 नुसार तो संरक्षित प्राणी आहे. त्याची शिकार करणे अथवा शिकारीचा प्रयत्न करणे हा गंभीर गुन्हा असून दोषींवर दंड आणि कारावासाची कारवाई होऊ शकते. या प्रकरणात आरोपींबाबत माहिती देणाऱ्यांचे नाव गोपनीय ठेवून त्यांना रोख रकमेचे बक्षीस देण्यात येईल, असेही वनविभागाने स्पष्ट केले.
सदर बचाव कार्य मा. मिलीश दत्त शर्मा (उपवनसंरक्षक, सावंतवाडी) आणि डॉ. सुनील लाड (सहा. वनसंरक्षक, सावंतवाडी) यांच्या मार्गदर्शनाखाली पार पडले. या मोहिमेत वनक्षेत्रपाल कुडाळ श्री. संदीप कुंभार, वनपाल मालवण सदानंद परब, वनपाल नेरूर ता. सुर्यकांत सावंत, वनरक्षक धामापूर अतुल खोत, वनरक्षक कांदळगाव लक्ष्मण आमले, वनरक्षक नेरूर सचिन पाटील, वाहन चालक राहुल मयेकर तसेच RRT टीमचे सदस्य अनिल गावडे, दिवाकर बांबरर्डेकर, सुशांत करंगुटकर, वैभव अमरुस्कर, प्रसाद गावडे (कुडाळ) आणि राठीवडे पंचक्रोशीतील ग्रामस्थांनी महत्वपूर्ण सहभाग नोंदवला.
वनविभागाच्या तत्पर आणि समन्वयित प्रयत्नांमुळे ही मोहीम यशस्वीरीत्या पूर्ण झाली.
