वर्धापनदिन कार्यक्रमात जिल्हाधिकारी अनिल पाटील यांनी काढले बँक नेतृत्वाबाबत गौरव उद्गार..
ओरोस ता १
जिल्हा बँकेचा आलेख चढता आहे. सर्वसमावेशक डायनॅमिक लीडरशीप मिळाल्याने बँकेला मिळाल्याने हे यश मिळत आहे. बँकेने आज ए आय चा शुभारंभ केल्याने अधिकारी कर्मचारी यांनी पारदर्शकता आणि नम्रता पाळली पाहिजे. बँकेने आता जिल्ह्याचे दरडोई उत्पन्न वाढविण्यासाठी पुढाकार घेतला पाहिजे. पर्यटन जिल्हा असल्याने येथे केमिकल कंपन्या येवू शकत नाहीत. त्यामुळे उत्पादित होणाऱ्या फळांवर प्रक्रिया करणारे व्यवसाय, त्यासाठी आवश्यक बाजारपेठ निर्माण करून देण्यासाठी प्रयत्न करावा. तसेच पर्यटन पोषक व्यवसाय सुरू करण्यासाठी पुढाकार घ्यावा, असे आवाहन जिल्हाधिकारी अनिल पाटील यांनी केले.
सिंधुदुर्ग जिल्हा मध्यवर्ती सहकारी बँकेचा ४२ वा वर्धापनदिन मंगळवारी मोठ्या उत्साहात संपन्न झाला. यानिमित्त सिंधुदुर्गनगरी येथील पत्रकार भवन येथे विविध कार्यक्रमांचे आयोजन करण्यात आले होते. यावेळी जिल्हाधिकारी पाटील प्रमुख पाहुणे म्हणून बोलत होते. यावेळी व्यासपीठावर मुख्य कार्यकारी अधिकारी रवींद्र खेबुडकर, जिल्हा बँक अध्यक्ष मनीष दळवी, नाबार्ड व्यवस्थापक दिपाली माळी, जिल्हा सहकारी संस्था उपनिबंधक डॉ सोपान शिंदे, बँकेचे मुख्य कार्यकारी अधिकारी प्रमोद गावडे, संचालक विठ्ठल देसाई, आत्माराम ओटवणेकर, प्रकाश मोर्ये, प्रज्ञा ढवण, गजानन गावडे, व्हिक्टर डांटस, निता राणे, प्रकाश बोडस, मेघनाथ धुरी, गणपत देसाई, विद्यानंद परब, रवींद्र मडगावकर आदी उपस्थित होते.
