लोकसभा, विधानसभा निवडणुकीत मिळविलेल्या यशामुळे मिळाली संधी
ओरोस ता १३
भारतीय जनता पक्षाच्या सिंधुदुर्ग जिल्हाध्यक्षपदी विद्यमान अध्यक्ष प्रभाकर सावंत यांना पुन्हा संधी मिळाली आहे. राज्यभरातील अध्यक्षांची यादी निवडणूक निर्णय अधिकारी चैनसुख संचेती यांनी जाहीर केली आहे. त्यात श्री सावंत यांना सिंधुदुर्ग जिल्हाध्यक्ष म्हणून घोषित करण्यात आले आहे.
भारतीय जनता पक्षाचे जिल्हाध्यक्ष म्हणून प्रभाकर सावंत यांनी गेली दोन वर्ष चांगल्या कामाची छाप या जिल्ह्यात उमटवली आहे. लोकसभा आणि विधानसभा निवडणुकीत सिंधुदुर्ग जिल्ह्यात मोठे यश मिळविले होते. त्यांच्या काळात नारायण राणे यांच्या रूपाने भाजपाचे पहिले खासदार म्हणून निवडून आले. त्यानंतर महायुतीचे तिनही आमदार मोठ्या मताधिक्क्याने निवडून आले. राज्यात व केंद्रात भाजपचे सरकार असून या सुवर्ण काळात प्रभाकर सावंत यांनी भाजपाची प्रतिमा उंचावण्याचा चांगला प्रयत्न केला. तीनही विधानसभा मतदारसंघातील भाजप बुथ रचनेची बांधणी व भाजप सदस्यता अभियान नोंदणी कार्यक्रम यातही त्यांचे फार मोठे योगदान आहे. त्यामुळे पक्षीय निवडणुकीत प्रभाकर सावंत याना पुन्हा संधी मिळणार असल्याची चर्चा होती. त्यानुसार त्यांना पुन्हा जिल्हाध्यक्ष करण्यात आल्याची घोषणा करण्यात आली आहे.
चौकट
प्रभाकर सावंत यांनी २८ वर्षांपूर्वी भाजपा युवा मोर्चा पासून कामाची सुरवात केली. या काळात त्यांनी भाजपा युवा मोर्चा जिल्हा सरचिटणीस, जिल्हाध्यक्ष ही पक्षीय जबाबदारी सांभाळली. त्यांची पत्नी पंचायत समिती सदस्य होती. त्यानंतर प्रभाकर सावंत भाजपा जिल्हा सरचिटणीस, संघटण सरचिटणीस ही पदे त्यांनी भूषविली. २०२३ मध्ये सिंधुदुर्ग भाजपाचे अध्यक्ष झाले. गेली २ वर्षे कुशलपणे संघटना हाताळली. या कार्यकाळात नवीन जुने भेदभाव न ठेवता सर्व कार्यकर्त्यांचा सन्मान राखण्याचा प्रमाणिक प्रयत्न केला. तसेच सर्व नेत्यांमधील दुवा बनून सर्व सहकाऱ्यांना सोबत घेऊन काम केले. परंतु समाजातील डॉक्टर, वकील, साहित्यिक, विविध संस्था पदाधिकारी यांना विविध कार्यक्रमाच्या माध्यमातून पक्षाच्या प्रवाहात आणण्याचे काम केले. त्यामुळे लोकसभा, विधानसभा, पदवीधर मतदारसंघ या निवडणुकामध्ये भाजपाला भरभरून यश मिळाले व सर्वांच्या मदतीने संघटना एका वेगळ्या उंचीवर नेऊन ठेवली.
कोट
आज भाजपा प्रदेश कडून जाहीर झालेल्या जिल्हाध्यक्ष यादी मध्ये आपल्याला परत एकदा संधी देण्यात आली. आगामी काळात जिल्हापरिषद, नगरपालिका निवडणुका असून प्रदेशाध्यक्ष चंद्रशेखर बावनकुळे, खा नारायण राणे, प्रदेश कार्याध्यक्ष रविंद्र चव्हाण, मंत्री नितेश राणे, अतुल कळसेकर, अजित गोगटे, प्रमोद जठार यांच्या मार्गदर्शना खाली व सर्व सहकाऱ्यानंच्या मदतीने भाजपाला शतप्रतीशत यश मिळवून देण्यासाठी आपला प्रयत्न राहणार. मागील काळात जिल्हाध्यक्ष म्हणून मिळालेल्या संधीचे सोने करता आले. या जिल्ह्यात पक्षीय चळवळ चांगल्या पद्धतीने उभी करता आली. गावागावातील विकास कामे व जनतेशी सुसंवाद या पदावर काम करताना साधता आला.
प्रभाकर सावंत
जिल्हाध्यक्ष
