⚡मालवण ता.२४-:
आचरा येथील इनामदार श्री देव रामेश्वर संस्थानची डाळपस्वारीची तारीख जाहीर झाली असून रविवार २ ते ७ फेब्रुवारी या कालावधीत ती संपन्न होणार असल्याची माहिती देवस्थान समितीचे सचिव संतोष मिराशी आणि देवस्थान समिती यांनी प्रसिद्धी पत्रकाद्वारे दिली आहे.
मालवण तालुक्यातील जागृत आणि प्राचिन शीवस्थानामुळे इनामदार श्री देव रामेश्वर संस्थानची महती सर्वदूर पसरली आहे.येथील सण उत्सव संस्थानी थाटात साजरे होत असतात. अशाच प्रकारे दर तीन वर्षांनी होणारी डाळपस्वारी या वर्षी श्रींच्या कौल प्रसादाने रविवार दोन फेब्रुवारी पासून सुरु होत आहे. रविवार दोन फेब्रूवारी ला सकाळी रामेश्वर मंदिर येथून श्रींची स्वारी डाळपस्वारी ला बाहेर पडणार आहे.आचरा बाजारपेठ फुरसाई मंदिर येथील डाळप करून मिराशी वाडी ब्राम्हणदेव येथे भेट दिल्यानंतर सायंकाळी नागझरी गिरावळ मंदिर (पूर्वी आकारी)येथे विसावणार आहे.
सोमवारी ३ फेब्रुवारीला गिरावळ मंदिर येथे मुक्काम केला जाणार असून मंगळवार चार रोजी दुपारनंतर रास पोटाळून भंडारवाडी, बौद्धवाडी स्थळ येथील डाळप करुन सायंकाळी उशिरापर्यंत गाऊडवाडी ब्राम्हणदेव मंदिर येथे विश्रांती साठी थांबणार आहेत. रात्रीच्या विश्रांती नंतर बुधवार रोजी श्री ब्राम्हणदेव मंदिर येथून पांगेवाडी मंडप गाउडवाडी, जामडूल, पिरावाडी चव्हाटा मार्गे हिर्लेवाडी ब्राम्हणदेव मंदिरास भेट देऊन पहाटे पुन्हा गिरावळ मंदिराकडे येणार आहेत.गुरुवारी गिरावळ मंदिराकडे विश्रांती नंतर शुक्रवारी आचरा बाजारपेठ मार्गे नागोचीवाडी ब्राम्हणदेव ,पारवाडी ब्राम्हणदेव मंदिराकडील डाळप करून रामेश्वर भेटीनंतर पहाटे पर्यंत देवूळवाडी गांगेश्वर मंदिराकडे स्थिरावणार आहे.
