युथ बिट्स फॉर क्लायमेट संस्था व स. का. पाटील सिंधुदुर्ग महाविद्यालयाचा निर्णय..
⚡मालवण ता.१७-: निसर्ग, पर्यावरण संवर्धन व संरक्षणाच्या च्या दृष्टीने विविध अभिनव उपक्रम राबविण्याच्या उद्देशाने मालवण मधील पर्यावरण विषयक उपक्रम राबविणाऱ्या स. का. पाटील सिंधुदुर्ग महाविद्यालय आणि पर्यावरण चळवळीतील अग्रणी संस्था युथ बिट्स फॉर क्लायमेट या दोन संस्थांमध्ये सामंजस्य करार झाला. या दोन्ही संस्थांनी एकत्र येऊन करारावर स्वाक्षऱ्या केल्या.
स. का. पाटील सिंधुदुर्ग महाविद्यालय एनएसएसच्या आणि इतर विभागांच्या माध्यमातून मालवण तालुका परिसरात सातत्याने स्वच्छ भारत अभियान, पर्यावरण जन जागृती, निसर्ग संवर्धन इत्यादी उपक्रमांमध्ये सक्रिय सहभागी होत असते. तसेच मालवण मधील पर्यावरण चळवळीतील अग्रणी संस्था युथ बिट्स फॉर क्लायमेट गेली काही वर्षे किनारा स्वच्छता, वाढत्या तापमानाबद्दल जाणीवजागृती, इकोमेट्सच्या माध्यमातून निसर्ग सहली असे अनेक उपक्रम यशस्वीपणे राबवत आहे. या दोन्ही संस्थांनी एकत्र येऊन पर्यावरण संवर्धन उपक्रम राबविण्यासाठी सामंजस्य करारावर सह्या केल्या. मालवण परिसराचा पर्यावरण शिक्षण आणि संवर्धनाच्या दृष्टीने महाविद्यालयाने हे महत्त्वाचे पाऊल उचलले आहे, असे मत प्राचार्य डॉ शिवराम ठाकूर यांनी ह्या करारावर स्वाक्षरी करताना व्यक्त केले.
युथ बिट्स फॉर क्लायमेटच्या वतीने अध्यक्ष स्वाती पारकर यांनी सही केली. महाविद्यालयाच्या वतीने एनएसएस प्रोग्राम ऑफिसर, प्राणीशास्त्र विभागप्रमुख आणि भूगोल विभागप्रमुख हे या करारासाठी संपर्क व्यक्ती असणार आहेत. दोन्ही संस्था कॉलेजच्या विद्यार्थ्यांसाठी आणि समाजासाठी एकत्रितपणे निसर्गविषयक चर्चासत्रे, शिबिरे, सहली, क्षेत्र भेटी, स्वच्छ्ता अभियान, निसर्ग शिक्षण, स्पर्धा, निसर्ग संवर्धन आणि संशोधन असे उपक्रम राबविणार आहेत, अशी माहिती अंतर्गत गुणवत्ता हमी कक्षाच्या समन्वयक डॉ. सुमेधा नाईक यांनी दिली. या सामंजस्य कराराअंतर्गत पहिला उपक्रम म्हणजे १५ जून पासून निसर्गशाळा ह्या उपक्रमाची सुरुवात करण्यात आली आहे. १० ते १४ वर्षे वयोगटातील म्हणजेच पाचवी ते नववी मधील विद्यार्थ्यांना पर्यावरण शिक्षण मिळावे, आजूबाजूचा भवताल समजून घेता यावा, या साठी ही निसर्गशाळा वर्षभर चालणार आहे. यासाठी नोंदणी करण्याचे आवाहन दोन्ही संस्थांनी केले आहे. यावेळी प्राचार्य डॉ. शिवराम ठाकूर, डॉ. सुमेधा नाईक, कैलास साळुंके, स्वाती पारकर, नेहा कोळंबकर महेश काळसेकर आदी उपस्थित होते.
