कुडाळ येथील रेस्क्यू पथकाने कोल्ह्याला विहिरीतून काढले सुखरूप बाहेर
मालवण तालुक्यातील धामापूर पेठवाडीतील दिनेश काळसेकर यांच्या विहीरी मध्ये सोनेरी कोल्हा पडल्याची घटना आज दुपारी १२ वाजण्याच्या सुमारास घडली. ग्रामस्थ सुशीलकुमार घाडी यांना कोल्हा विहिरीत पडल्याचे लक्षात येताच वनविभागाला कळविल्यानंतर वनपरिक्षेत्र कुडाळच्या रेस्क्यू पथकाने तात्काळ घटनास्थळी दाखल होत १५ ते २० फूट खोल विहिरीतून या कोल्ह्यास सुखरूप बाहेर काढले.
जिल्ह्यात जंगली भागातून भक्ष्याच्या मागे धावत आलेले बिबटे मानवी वस्तीत येऊन विहिरीत पडल्याच्या घटना अनेकदा घडल्या आहेत. याच पार्श्वभूमीवर भक्ष्याच्या मागे धावताना अंदाज न आल्याने कठडा नसलेल्या या विहिरीत कोल्हा पडला असावा असे वनपरिक्षेत्र अधिकारी कुडाळ श्री. अमृत शिंदे यांनी सांगितले.
या विहिरीत पाण्याची पातळी सुमारे ४ ते ५ फूट असून या विहिरीत कोल्ह्याने बिळ केले होते. तो पाण्याबाहेर येताच त्या बिळामध्ये जात असल्याने त्याला पकडण्यात अडचण येत होती. अखेर अथक प्रयत्नाने त्यास पिंजऱ्यात घेण्यात वन विभागाच्या बचाव पथकास यश आले.
ग्रामस्थांनी वेळीच माहिती वनविभागाला देऊन बचाव कार्यास देखील मदत केल्याने या सोनेरी कोल्ह्याचा जीव वाचवता आला असे यावेळी शिंदे यांनी सांगत त्यासाठी ग्रामस्थांचे आभार व्यक्त केले. पशुवैद्यकीय अधिकारी यांच्या कडून त्याची वैद्यकीय तपासणी करून त्यास नैसर्गिक अधिवासात मूक्त करण्यात आले.
प्रभारी उपवनसंरक्षक श्री.दीपक खाडे यांच्या मार्गदर्शनाखाली कुडाळ वनपरिक्षेत्र अधिकारी अमृत शिंदे, वनपाल मालवण श्रीकृष्ण परीट, वनरक्षक धामापूर श्री. शरद कांबळे, वाहनचालक राहुल मयेकर यांनी स्थानिक ग्रामस्थ सुशील घाडी, बाळकृष्ण घाडीगावकर, दिनेश काळसेकर, तेजस वालावलकर, चेतन काळसेकर यांच्या मदतीने या कोल्ह्याला वाचविण्यात आले.
