मालवण ता.०२-:* देवबाग येथील मत्स्यगंधा समर्थ थिएटर्स मध्ये सध्या पावनखिंड हा ऐतिहासिक घटनेवरील चित्रपट दाखविण्यात येत असून शालेय विद्यार्थ्यांना इतिहास समजावा या हेतुने ऐतिहासिक पावनखिंड चित्रपट देवबाग येथील शालेय विद्यार्थ्यांना आज विनामुल्य दाखवण्यात आला.
दरम्यान, उद्या दि. ३ मार्च रोजी सकाळी ९.३० वाजता देवबाग येथील डाॕ.दत्ता सामंत हायस्कूलच्या विद्यार्थ्यांसाठी मोफत चित्रपटाचे आयोजन केले आहे. छत्रपती शिवाजी महाराज आणि त्यांच्या मावळ्यांच्या पराक्रमाचे इतिहासांच्या पानांमध्ये दडलेलं वैभव रुपेरी पडद्यावर अवतरले आहे. स्वराज्याची सेवा, राजांशी निष्ठा, गनिमांचा खात्मा, मृत्यू समोर उभा ठाकला तरी केली जाणारी वचनपूर्तता हे सर्व गुण शिवरायांच्या मावळ्यांच्या रक्तात अक्षरश: भिनले होते.
त्यांच पवित्र रक्तानं पावन झालेल्या घोडखिंडीचा इतिहास ‘पावनखिंड’ या नुकत्याच प्रदर्शित झालेल्या चित्रपटात पाहायला मिळत आहे. हा चित्रपट देवबाग मधील मत्स्यगंधा समर्थ थिएटर्स मध्ये दाखविण्यात येत असून आज थिएटर्सच्या वतीने देवबाग मधील विद्यार्थ्यांना हा चित्रपट विनामूल्य दाखविण्यात आला. हा चित्रपट विनामुल्य उपलब्ध केल्याबद्दल देवबाग येथील जि.प.शाळा नं.०१,जि.प.शाळा नं.०२,जि,प.शाळा नं ०३ आणि सेंट पिटर चर्च या चार शाळांनी पी अँड पी समुहाचे पत्र देत आभार मानले. अन्य शाळांसाठी मत्स्यगंधा थिएटर्स, देवबाग येथे शालेय विद्यार्थ्यांसाठी दि. ३ मार्च पासुन दररोज सवलतीच्या दरात ‘पावनखिंड’ चित्रपट दाखवला जाणार असल्याची माहीती पी अँड पी समुह प्रा.लि. यांनी दिली आहे. शाळेच्या शिक्षकांनी अधिक माहितीसाठी व्यवस्थापक ७८२२००५५८५ यांना संपर्क करावा असे आवाहन पी अँड पी समुह प्रा.लि.यांनी केले आहे.
