गावात चैतन्याचे व भक्तीचे वातावरण;तरंगकाठीचे व पालखीचे ग्रामस्थांकडून विधीवत पूजन
*💫सावंतवाडी दि.३१सहदेव राऊळ-:* मळगाव पंचायतन देवस्थानची तरंगकाठी देवीच्या पालखीसह मळगाव ग्रामस्थांच्या भेटीसाठी कोरोनाच्या पार्श्वभूमीवर शासनाचे सर्व नियम पाळून घरोघरी फिरविण्यात येत आहे. या कार्यक्रमामुळे गावात चैतन्याचे व भक्तीचे वातावरण असून घरी आलेल्या तरंगकाठीचे व पालखीचे ग्रामस्थ पारंपरिक रितीरिवाजाप्रमाणे विधीवत, भक्तिभावाने पूजन करीत आहेत. मळगाव-सोनुर्ली देवस्थानचा सोनुर्ली माऊली जत्रोत्सब पार पडल्यानंतर मळगाव गावात पंचायतन देवस्थानची तरंगकाठी घरोघरी फिरविण्याची प्रथा गेल्या कित्येक वर्षापासून चालत आली आहे. मात्र कोरोनाच्या पार्श्वभूमीवर यावर्षी ही तरंगकाठी फिरवायला वेळ लागला. तत्पूर्वी ही तरंगकाठी सोनुर्ली जत्रोत्सवासाठी नेली जाते. मळगाव व सोनुर्ली देवस्थान एक असल्याने तरंगकाठी व पालखी जत्रोत्सवानंतर सोनुर्ली येथे पाहुणचारासाठी थांबते. या दरम्यान सोनुर्ली गावातही ही तरंगकाठी घरोघरी फिरविली जाते. मात्र त्यावेळी कोरोनाचे संक्रमण जास्त असल्याने यंदा सोनुर्ली गावात तरंगकाठी घरोघरी फिरविण्यात आली नाही. सोनुर्ली येथून पुन्हा मळगाव गावात आल्यावर तरंगकाठी मळगावात घरोघरी फिरविली जाते. यावेळी गावातील गोसावी मठालाही भेट देण्यात येते. यासाठी सुमारे महिनाभराचा कालावधी लागतो. दरवर्षीप्रमाणे यंदाही कुळघराकडून विधिवत तरंगकाठी व पालखीचे पूजन झाल्यावर ढोलांच्या गजरात शासनाचे नियम पाळून मानकऱ्यांच्या उपस्थितीत गावचे मानकरी सावंत यांच्या घरापासून तरंगकाठी फिरविण्यास सुरुवात करण्यात आली. त्यानंतर पाडगावकर, जोशी आदी मानकऱ्यांसह गावात घरोघरी तरंगकाठी फिरवून बाकी गावात तरंगकाठी फिरविण्यास सुरुवात करण्यात आली. यावेळी घरातील व्यक्तींनी तरंगकाठीची विधीवत पूजा-अर्चा केली. तसेच देवीची ओटी भरण्यात आली. यावेळी सुवासिनींनी देवीस साडी अर्पण करुन नवसफेड केली. या सोहळ्यात मोठ्यांसह लहान मुलेही सहभागी झाली होती. असंख्य वर्षांची ही परंपरा गाव एकोप्याने जपत आले आहे.
