प्रदेशाध्यक्ष रवींद्र चव्हाण व पालकमंत्री नितेश राणे यांची प्रमुख उपस्थिती..
सावंतवाडी । प्रतिनिधी : सावंतवाडी नगरपरिषदेच्या आगामी निवडणुकीच्या पार्श्वभूमीवर भारतीय जनता पार्टीने प्रचाराची रणधुमाळी सुरू केली असून, पक्षाच्या स्टार प्रचारकांची फौज जिल्ह्यात दाखल होत आहे. भाजपच्या उमेदवारांच्या प्रचारार्थ उद्या, मंगळवार, दिनांक २५ नोव्हेंबर रोजी सावंतवाडीतील गांधी चौक येथे एका भव्य प्रचार सभेचे आयोजन करण्यात आले आहे. ही सभा ठीक सकाळी १०.०० वाजता सुरू होईल.
या महत्त्वपूर्ण सभेला भारतीय जनता पार्टी, महाराष्ट्र प्रदेशचे अध्यक्ष सन्माननीय आ. रविंद्र चव्हाण आणि राज्याचे मत्स्यव्यवसाय व बंदरे विकास मंत्री तथा सिंधुदुर्ग जिल्ह्याचे पालकमंत्री ना. नितेश राणे यांची प्रमुख उपस्थिती लाभणार आहे. सावंतवाडी नगरपरिषदेच्या नगराध्यक्षपदाचे उमेदवार तसेच सर्व २१ प्रभागांतील नगरसेवक पदाचे उमेदवार यांच्या प्रचारार्थ हे दोन्ही नेते जिल्ह्याच्या दौऱ्यावर येत आहेत.
सभेमध्ये भाजपचे प्रदेशाध्यक्ष आणि जिल्ह्याचे पालकमंत्री हे सावंतवाडी शहरासाठी पक्षाचे व्हिजन स्पष्ट करतील आणि शहरवासीयांना विकासाची ग्वाही देतील. तसेच, भाजपचे स्थानिक उमेदवार शहराचा विकास कसा करतील, याबद्दल मार्गदर्शन करतील तरी सावंतवाडीतील नागरिकांनी या सभेला मोठ्या संख्येने उपस्थित राहावे, असे आवाहन भाजपच्या स्थानिक निवडणूक प्रचार समितीने केले आहे.
