⚡ओरोस ता ७-: मालवण कसाल राज्य मार्गावरील रानबाबुळी येथे आराम बस आणि मोटरसायकल यामध्ये झालेल्या अपघातात मोटरसायकल स्वार गणेश चंद्रकांत घोगळे (रा वराड ता. मालवण) हा २८ वर्षीय तरुण जागीच ठार झाला. तर त्याच्यामागे बसलेली तरुणी जखमी झाली आहे. दरम्यान, नुकसान भरपाई मिळाल्याशिवाय मृतदेह ताब्यात घेण्यास ग्रामस्थांनी नकार दिल्याने सायंकाळी उशिरापर्यंत मृतदेह रस्त्यावरच होता. यामुळे दीड तासाहून अधिक काळ येथील दोन्ही बाजूची वाहतूक रोखली गेली होती. सायंकाळी उशिरा मृतदेह जिल्हा रुग्णालयात हलविण्यात ग्रामस्थांनी सहमती दर्शविल्याने वाहतूक सुरळीत झाली.
मालवण कसाल या रस्त्यावर मालवणहून मुंबईच्या दिशेने जाणारी आराम बस क्रमांक एम पी ४१ झेड जे ७४१० ही रानबांबुळी फाट्या जवळील अवघड वळणावर आली असता समोरून कसाल वरून वराडच्या दिशेला जाणारी सुझुकी जिक्सर मोटरसायकल क्रमांक एम एच ०७ एटी ८८७८ ही आली असता आराम बसला तिची धडक बसली. यावेळी मोटर सायकल स्वार गणेश हा रस्त्यावर कोसळल्याने त्याच्या अंगावरून बस गेली. तर त्याच्या पाठीमागे बसलेली रुची राजन वालावलकर रा. गावराई तालुका कुडाळ वय २४ ही रस्त्याच्या बाजूला फेकली गेली. त्यामुळे ती वाचली. तिला किरकोळ जखमा झाल्या. तर मोटरसायकलला वाचवण्याच्या नादात आराम बस रस्त्याच्या खाली उतरली. यामुळे आराम बसमधील काही प्रवासी किरकोळ जखमी झाले. या सर्वांवर सिंधुदुर्गनगरी येथील जिल्हा रुग्णालयात उपचार करण्यात आले.
हा अपघात सायंकाळी रविवारी सायंकाळी ४:३० वाजण्याच्या सुमारास घडला. अपघाताची खबर समजतात रानबांबुळी, सुकळवाड, वराड, कट्टा, गावराई, ओरोस सह आजूबाजूच्या सर्व ग्रामस्थांनी अपघात स्थळी धाव घेतली. तसेच सिंधुदुर्गनगरी पोलीस स्थानकाचे प्रभारी अधिकारी शेखर लव्हे यांच्यासह सिंधुदुर्गनगरी पोलीस घटनास्थळी दाखल झाले. मात्र जोपर्यंत आराम बसचा मालक येऊन नुकसान भरपाई देत नाही तोपर्यंत रस्त्यावरील मृतदेह आम्ही हलवणार नाही, असा पवित्रा वराड ग्रामस्थांनी घेतला. पोलिसांनी यामध्ये मध्यस्थी करण्याचा प्रयत्न केला मात्र हे सर्व ग्रामस्थ आपल्या म्हणण्यावर ठाम राहत आक्रमकही झाले होते. घटनास्थळी वाढलेली गर्दी पाहता पोलिसांनी मोठ्या प्रमाणात पोलीस बंदोबस्त मागविला होता. सिंधुदुर्गनगरीसह कणकवली, कुडाळ, मालवण आदी भागातून मोठ्या प्रमाणात पोलीस घटनास्थळी दाखल झाले होते. तसेच घटनास्थळी शीघ्रकृती दलाला पाचारण करण्यात आले होते.
मालवण कसाल राज्य मार्गावर आराम बस व मोटरसायकल अपघातात मोटरसायकल स्वार जागीच ठार…!
