⚡मालवण ता.०५-:
नारळी पौर्णिमेनिमित्त मालवण येथील सौ. शिल्पा यतीन खोत मित्रमंडळ आयोजित व स्वराज्य संघटना, सिंधुरक्त मित्र प्रतिष्ठान, कोकण वाईल्ड रेस्क्युअर सिंधुदुर्ग, सेवते प्रतिष्ठान यांच्या सहकार्याने महिलांसाठी राज्यस्तरीय नारळ लढविणे स्पर्धा दि. ८ ऑगस्ट रोजी दुपारी ३ वाजता मालवण बंदर जेटी येथे होणार आहे. गेली १० वर्षे आयोजित होणाऱ्या या भव्य दिव्य स्पर्धेचे यावर्षी अकरावे वर्ष असून बहुसंख्य महिलांच्या उपस्थितीत या स्पर्धेचा थरार रंगणार आहे, अशी माहिती सौ. शिल्पा यतीन खोत यांनी पत्रकार परिषदेत दिली.
मालवण येथील शासकीय विश्रामग्रुह येथे आयोजित पत्रकार परिषदेत सौ. शिल्पा खोत यांनी स्पर्धेची माहिती दिली. यावेळी माजी नगरसेवक यतीन खोत, सौ. मिताली कोरगावकर, मंदार सरजोशी आदी व इतर सदस्य उपस्थित होते.
या स्पर्धेतील विजेत्या स्पर्धकास स्पर्धेचे खास आकर्षण असलेला सोन्या चांदीने मढवलेला नारळ, सोन्याचा कॉइन, सोन्याची नथ इरकल पैठणी यांसोबत विजेता चषक तसेच उपविजेत्या स्पर्धकास सोन्याची नथ, पैठणी यांसह चषक यासोबत तृतीय विजेत्यास सोन्याची नथ व पैठणी तसेच पाच उत्तेजनार्थ स्पर्धकांना चांदीची मूर्ती, गृहोपयोगी भेटवस्तू असा बक्षीसांचा वर्षाव होणार आहे.
या सोबत उपस्थित प्रेक्षकांसाठी लकी ड्रॉ असून त्यात विशेष पारितोषिक असणार आहे. तर स्पर्धेत नाव नोंदणी करणाऱ्या पहिल्या ३०० स्पर्धकांना आकर्षक भेटवस्तू असून उर्वरित स्पर्धकांनाही बक्षीस जिंकण्याची संधी असणार आहे, अशी माहिती सौ. शिल्पा खोत यांनी दिली.
यावेळी लहान मुलांसाठी देखील नारळ लढविण्याची स्पर्धा संपन्न होणार आहे. तसेच यावेळी स्वराज्य ढोल ताशा पथकाचे महाकाल या संकल्पनेवर वादन होणार आहे. स्पर्धेत खास आकर्षण स्वरूपात झी मराठी गांव गाता गजाली फेम आर्टिस्ट यांचे १० फुटी महाबली हनुमान असणार आहेत. स्पर्धेचे निवेदन मालवणी निवेदक बादल चौधरी आणि अक्षय सातार्डेकर करणार आहेत.
यावेळी सौ. शिल्पा खोत म्हणाल्या, नारळ लढविणे हा पारंपारिक खेळ पुरुष प्रधान खेळ होता. मात्र, दहा वर्षांपूर्वी आमच्या मित्रमंडळाने महिला भगिनींना या खेळातही स्पर्धात्मक व्यासपीठ मिळावे या हेतूने
महिलांसाठी नारळी लढविणे स्पर्धेचे सर्वप्रथम आयोजन केले. ही स्पर्धा सिंधुदुर्ग जिल्ह्यातील मानाची स्पर्धा म्हणून ओळखली गेली. या खेळातील पुरुषप्रधान परंपरा मोडीत काढत आज मोठ्या संख्येने महिला यामध्ये सहभागी होत आहेत. स्पर्धा लक्षवेधी ठरली. या स्पर्धेचे श्रेय महिला भगिनींचे, मालवण वासियांचे व आमच्या सर्व सहकाऱ्यांचे आहे, असे शिल्पा खोत यांनी सांगितले.
या स्पर्धेच्या अधिक माहिती व नाव नोंदणीसाठी शिल्पा खोत 9422584641, तन्वी भगत 8104500843, सायली कांबळी
9137303370, निकिता तोडणकर 7588472876 यांच्याशी संपर्क साधवा, असे आवाहन सौ. शिल्पा यतीन खोत मित्रमंडळाच्या वतीने करण्यात आले आहे.
