कणकवलीत वृद्धेचा जळून मृत्यू…!

⚡कणकवली ता.२९-: शहरातील कांबळेगल्ली येथील कामत कॉर्नर नजीकच्या इमारतीमध्ये दुसऱ्या मजल्यावर भाचीच्या फ्लॅटमध्ये रत्नप्रभा पंडीत ( वय ८५ ) ही वृद्ध महिला गेली वीस वर्ष एकटीच राहत होती. तिचा भाचा
संतोष दिनकर सुखटणकर (रा. कणकवली, जळकेवाडी ) हा एम. आर आहे. त्याने त्या फ्लॅट मधील हॉलच्या रुममध्ये व्यवसायासाठी आवश्यक औषधांचे बॉक्स ठेवले होते. त्यामुळे त्याचे अधून मधून येणे जाणे होते. त्या फ्लॅटच्या हॉलमध्ये रत्नप्रभा पंडित ही एका बाजुला लोखंडी कॉटवर झोपत असे. ती वयस्कर असल्यामुळे घरी जेवण बनवत नव्हती. तिला जेवणाचा डबा एक महिला देत असे. या व्यतिरिक्त चहा व नाष्टा रत्नप्रभा ही स्वतः बनवत होती. तसेच तिला स्वप्न पडतात म्हणून रात्री झोपताना आपल्या जवळच अगरबत्ती लावण्याची तिला सवय होती.

रत्नप्रभा यांना जेवणाचा डबा देणारी महिला सोमवारी दुपारी दोन वाजण्याच्या सुमारास त्या फ्लॅटकडे गेली. त्यावेळी आवाज देऊन, दरवाजा ठोठावून देखील रत्नप्रभा हीने तो उघडला नाही. काही वेळा प्रयत्न करूनही दरवाजा उघडला नसल्याने त्या महिलेने संतोष सुखटणकर याला फोन करून माहिती दिली. ताबडतोब संतोष हा तिथे गेला. तसेच दरवाजा उघडण्याचा प्रयत्न केला. परंतु समोरून कोणत्याही प्रकारचे प्रतिसाद मिळत नव्हते. त्यामुळे काही नागरीकांच्या मदतीने कटावणीच्या सहाय्याने आतील कडी काढुन दरवाजा उघडला. त्यावेळी आत रत्नप्रभा ही जळालेल्या व आगीमध्ये होरपळलेल्या अवस्थेत कॉटच्या खाली उताण्या स्थितीत बेशुध्द पडलेली होती. तसेच
लोखंडी कॉटवरील गादीसह चादरी वगैरे सर्व अंथरुण जळून खाक झाले होते. त्यानंतर रत्नप्रभा यांना रुग्णवाहिकेतून येथील उपजिल्हा रुग्णालय कणकवली येथे नेण्यात आले. रुग्णालयातील डॉक्टरांनी तपासून ती मृत झाल्याचे सांगितले. रत्नप्रभा पंडीत हीचा विवाह झालेला नव्हता. फ्लॅटमध्ये अचानक आग लागण्याचे नेमके कारण स्पष्ट होवू शकलेले नाही. या घटनेबाबत कणकवली पोलिस ठाण्यात संतोष सुखटणकर यांनी माहिती दिली, असून आकस्मिक मृत्यू म्हणून या घटनेची नोंद करण्यात आली आहे. अधिक तपास पोलिस उपनिरीक्षक विनोद सुपल करत आहेत.