⚡देवगड ता.२९-: पारंपारिक रापण महोत्सव समिती कुणकेश्वर कुणकेश्वर कातवण, श्री देव कुणकेश्वर मंदिर देवस्थान ट्रस्ट, कुणकेश्वर व कातवण ग्रामपंचायत, कुणकेश्वर विकास कार्यकारी सहकारी सेवा सोसायटी,देवगड तालुका व्यापारी पर्यटन समिती यांच्या संयुक्त विद्यमाने शुक्रवार ८ नोव्हेंबर ते सोमवार ११ नोव्हेंबर २०२४ या कालावधीत रापण महोत्सव २०२४ चे आयोजन कुणकेश्वर येथे करण्यात आले आहे. या रापण महोत्सवाचे उद्घाटन उद्योजक प्रकाश गायकवाड यांच्या हस्ते शुक्रवार ८ नोव्हेंबर रोजी सायंकाळी ७ वाजता होणार आहे.
या रापण महोत्सवानिमित्त आयोजित करण्यात आलेले कार्यक्रम शुक्रवार ८ नोव्हेंबर रोजी सायंकाळी ६ वाजता ढोलपथक वादन, सायंकाळी ७ ते ८ उद्घाटन समारंभ व मार्गदर्शन मान्यवरांचे सत्कार समारंभ, रात्री ८ ते ११ दिंडी संगीत कार्यक्रम, शनिवार ९ नोव्हेंबर २०२४ रोजी सायंकाळी ६ ते ८ मान्यवरांचे मार्गदर्शन व सत्कार समारंभ, रात्री ८ ते ११ राज्यस्तरीय सोलो रेकॉर्ड डान्स स्पर्धा, रविवार १० नोव्हेंबर सायंकाळी ६ ते ८ मान्यवरांचे मार्गदर्शन सत्कार समारंभ, ७ ते ८ सेलिब्रिटींचे स्वागत व सन्मान, रात्री ८ ते ११ सई एंटरटेनमेंट प्रस्तुत अभिनेता निलेश गुरव निर्मित आर्केस्ट्रा जल्लोष २०२४ चे सादरीकरण होणार आहे. सोमवार ११ नोव्हेंबर रोजी ७ ते ८ मान्यवरांचे मार्गदर्शन सत्कार समारंभ ८ ते ११वाजता. स्थानिक कलावंतांच्या सांस्कृतिक कलाविष्कार ,रात्री ११ वाजता कार्यक्रम समारोप होणार आहे.
या वर्षी होणाऱ्या ८ ते ११ नोव्हेंबर २०२४ या वेळेत होणाऱ्या रापण महोत्सवात सकाळी ८ ते रात्री ११ वाजेपर्यंत भव्य कृषी व मत्स्य प्रदर्शन विविध खाद्यपदार्थांची स्टॉल विविध कार्यक्रमांचे आयोजन समुद्रातील विविध प्रकारच्या ताज्या मासळींचे रेसिपी कोकणी जेवणाची मेजवानी विविध शाकाहारी पदार्थही उपलब्ध असणार आहेत. या आपण महोत्सवाच्या माध्यमातून देशी-विदेशी पर्यटकांना विविध पारंपरिक मासेमारीची प्रात्यक्षिके कामकाजाची व साधनसमृद्धीची माहिती आणि कोकणी जेवणाची आणि खाद्यपदार्थांची चवही चाखता येणार आहे. म्हणूनच व्यवसायातून पर्यटन विकास हा प्रत्येकाच्या जीवनाचा अभिवाज्य भाग बनवा. त्यातून रोजगार संधी व पारंपरिक संस्कृती जतन करणे हा दृष्टिकोन ठेवून रापण महोत्सवाचे आयोजन आपण करत असल्याचे यावेळी आयोजकांनी सांगितले. या रापण महोत्सवास सर्वांनी सहभागी व्हावे, असे आवाहन आयोजकांच्या वतीने करण्यात आले आहे.
