*💫मालवण दि.११-:* मालवण कसाल रस्त्याची खड्ड्यांमुळे झालेली दुर्दशा व त्याकडे सत्ताधाऱ्यांचे झालेले दुर्लक्ष याच्या विरोधात मालवण तालुका भाजपच्या वतीने दि. १० डिसेंबर रोजी खड्डे पूजा हे अनोखे आंदोलन पुकारण्यात आले होते. मात्र शिवसेना जिल्हाप्रमुख संजय पडते यांच्या मुलाचे निधन झाल्याने स्थगित केलेले हे आंदोलन उद्या दि. १२ डिसेंबर रोजी मालवण- कसाल रस्त्यावर कुणकवळे येथे सकाळी ११.३० वाजता होणार आहे, अशी माहिती भाजप तालुकाध्यक्ष धोंडू चिंदरकर, शहरअध्यक्ष दीपक पाटकर, सभापती अजिंक्य पाताडे यांनी दिली आहे. मालवण कसाल व इतर प्रमुख रस्त्यांची खड्ड्यांमुळे दुर्दशा झाली असताना सत्ताधारी लोकप्रतिनिधींकडून विकासाच्या फक्त वल्गना केल्या जात आहेत. त्यांनी जनतेला वाऱ्यावर सोडले आहे. वाहनचालक, रिक्षा व्यावसायिक यांचे या खड्ड्यांमुळे आतापर्यंत अतोनात नुकसान झाले आहे. आता पर्यटन हंगाम सुरू झाल्याने खड्ड्यांमुळे अपघात होण्याच्या घटना वाढण्याची भीती आहे. आता खड्ड्यासोबत जगायचे असल्याने खड्ड्यांची पूजा करून त्यांनाच जनतेचे जीव वाचवण्याचे उपहासात्मक साकडे भाजपतर्फे घालण्यात येणार असल्याचे धोंडी चिंदरकर यांनी सांगितले. तसेच सार्वजनिक बांधकाम विभागाला या रस्त्याचे काम करण्याबाबत आठ दिवसांचा अल्टिमेटम देण्यात येणार आहे. या सदर आंदोलनात कार्यकर्त्यांसह जनतेनेही सहभाग घ्यावा, असे आवाहन चिंदरकर, पाताडे व पाटकर यांनी केले आहे.
भाजपतर्फे मालवण – कसाल रस्त्यावर आज खड्डे पूजा आंदोलन….
