मालवण (प्रतिनिधी)
मालवण शहरातील रस्त्यांवर आणि सार्वजनिक ठिकाणी फिरणाऱ्या मोकाट गुरांमुळे वाहतुकीला होणारा अडथळा आणि नागरिकांच्या सुरक्षिततेचा निर्माण झालेला प्रश्न लक्षात घेऊन नगरपरिषदेने गुरे पकडण्याची विशेष मोहीम सुरू केली आहे. या मोहिमेदरम्यान नगरपरिषदेच्या पथकाने शहरातील विविध भागांत फिरणाऱ्या मोकाट गुरांना पकडून ताब्यात घेतले आहे.
मालवण शहरात मोकाट गुरांचा संचार वाढला आहे. रस्त्यांच्या मधोमध अथवा वाहतुकीच्या मार्गावर गुरांचा वावर असल्याने वाहनचालकांना अचानक ब्रेक मारण्याची वेळ येते. त्यामुळे अपघाताचा धोका निर्माण होण्याची शक्यता असते. या पार्श्वभूमीवर नागरिकांच्या सुरक्षिततेला प्राधान्य देत ही कारवाई हाती घेण्यात आली आहे.
मोकाट गुरांचा प्रश्न केवळ वाहतुकीपुरता मर्यादित नसून शहराच्या स्वच्छतेवर आणि सौंदर्यावरही त्याचा परिणाम होत आहे. सार्वजनिक ठिकाणी गुरांचा वावर वाढल्याने नागरिकांना त्रास सहन करावा लागत आहे. त्यामुळे नगरपरिषदेच्या या कारवाईचे नागरिकांकडून स्वागत होत आहे.
दरम्यान, आपली जनावरे रस्त्यावर मोकाट सोडणाऱ्या पशुमालकांनी तातडीने योग्य ती व्यवस्था करावी, असे आवाहन नगरपरिषद प्रशासनाने केले आहे. जनावरे पुन्हा मोकाट आढळल्यास संबंधित पशुमालकांवर नगरपरिषदेच्या नियमांनुसार कारवाई करण्यात येईल, असा स्पष्ट इशारा प्रशासनाने दिला आहे.
