नगराध्यक्ष:प्रत्येक नागरिकाच्या न्याय्य हिताचे पूर्ण संरक्षण करणार..
कुडाळ : शहराचा प्रारूप विकास आराखडा हा शहराच्या आगामी प्रगतीसाठी अत्यंत महत्त्वाचा टप्पा असून, या संपूर्ण प्रक्रियेमध्ये नागरिकांचा सहभाग आणि त्यांचा विश्वास हेच नगरपंचायतीचे सर्वोच्च प्राधान्य आहे, अशी ग्वाही कुडाळच्या नगराध्यक्षांनी दिली आहे. विकास आराखड्याबाबत कोणतीही घाई, बळजबरी किंवा कोणत्याही नागरिकावर अन्याय होईल असा निर्णय घेतला जाणार नाही, असेही त्यांनी स्पष्ट केले आहे.
माहितीसाठी प्रत्येक वॉर्डात विशेष व्यवस्था
नगरपंचायत प्रशासनाने प्रारूप विकास आराखड्याची माहिती जाहीर प्रकटनाद्वारे नागरिकांसमोर ठेवली आहे. नागरिकांना ही माहिती सहज आणि सोप्या पद्धतीने मिळावी, यासाठी शहरातील प्रत्येक वॉर्डातील प्रमुख चौकांमध्ये प्रारूप आराखड्याची माहिती प्रदर्शित करण्यात आली आहे.
सध्या विकास आराखड्याबाबत नागरिकांच्या हरकती व सूचना नियमानुसार स्वीकारण्याची प्रक्रिया सुरू आहे. नगरपंचायत कार्यालयात येणाऱ्या प्रत्येक नागरिकाच्या हरकतींची व्यवस्थित नोंद घेतली जात आहे.
नागरिकांच्या मनातील शंकांचे प्रशासनाकडून प्रत्यक्ष निरसन केले जात आहे.
सर्व सूचना आणि हरकतींचा कायद्यानुसार व वस्तुनिष्ठपणे विचार करूनच पुढील कार्यवाही केली जाईल.
”कुडाळ शहराचा विकास हा सर्व नागरिकांच्या सहभागातून आणि विश्वासातूनच व्हावा, हीच नगरपंचायतीची भूमिका आहे. नागरिकांनी कोणत्याही अफवा किंवा गैरसमजांना बळी पडू नये. अधिकृत माहितीवर विश्वास ठेवून आपल्या सूचना व हरकती नियोजित मुदतीत नगरपंचायतीकडे सादर कराव्यात. नगराध्यक्ष म्हणून मी आश्वस्त करते की, प्रत्येक नागरिकाच्या न्याय्य हिताचे पूर्ण संरक्षण केले जाईल आणि सर्व प्रक्रिया पारदर्शक व कायदेशीर पद्धतीनेच राबविली जाईल.” असे नगराध्यक्षा, प्राजक्ता बांदेकर शिरवलकर यांनी सांगितले.
नगरपंचायतीने सर्व प्रक्रिया लोकाभिमुख ठेवल्याने नागरिकांनी प्रशासनाला सहकार्य करावे आणि आपल्या सूचना मुदतीत सादर कराव्यात, असे आवाहन प्रशासनातर्फे करण्यात आले आहे.
