जमावबंदी आदेशाचे उल्लंघन केल्याप्रकरणी सिंधुदुर्गनगरी पोलीस ठाण्याची कारवाई..
ओरोस ता ११
सिंधुदुर्गनगरी येथे जिल्हाधिकारी यांनी जारी केलेल्या जमावबंदी आदेशाचे उल्लंघन करून मोठ्या संख्येने नागरिकांनी मोर्चा काढल्याप्रकरणी सिंधुदुर्गनगरी पोलिसांनी १३ प्रमुखांसह सुमारे ८० ते ९० जणांविरुद्ध गुन्हा दाखल केला आहे.
ही घटना सोमवार १० नोव्हेंबर रोजी सकाळी ११ ते दुपारी १ वाजेच्या दरम्यान घडली. आम्ही भारतीय सिंधुदुर्ग यांच्यावतीने सोमवारी हा मोर्चा काढण्यात आला होता. सिंधुदुर्गनगरी येथील सिडको सर्कल ते पोलीस अधीक्षक कार्यालय, सिंधुदुर्ग या मार्गावर बेकायदेशीर जमाव जमवून मोर्चा काढला गेला. यावेळी जिल्हाधिकारी यांनी लागू केलेल्या जमावबंदी आदेशाचे तसेच भारतीय नागरिक सुरक्षा संहिता कलम १६८ च्या नोटिशीचे उल्लंघन करण्यात आले. या प्रकरणी पोलीस उपनिरीक्षक सूरज पाटील यांच्या तक्रारीवरून गुन्हा रजिस्टर नं. 66/2025 असा दाखल करण्यात आला आहे. आरोपींवर भारतीय न्याय संहिता 2023 चे कलम 189(2), 190, 223 तसेच महाराष्ट्र पोलीस अधिनियम 1951 चे कलम 37(2) व 135 अन्वये गुन्हा नोंदवण्यात आला आहे.
या गुन्ह्यात संदीप निंबाळकर (रा. सुकळवाड), जयेंद्र परुळेकर (रा. सावंतवाडी), डॉ. सतीश ललित (रा. ओरोस, खर्येवाडी), महेश परुळेकर (रा. कुडाळ), इजाज नाईक (रा. कुडाळ), रफिक मेमन (रा. सावंतवाडी), सर्फराज शेख (रा. कुडाळ), मोहन जाधव (रा. कुडाळ), एजाज मुल्ला (रा. कुडाळ), आसिफ शेख (रा. बांदा), अब्दुल रजाक शेख (रा. बांदा), असलम खेडेकर (रा. साटेली भेडशी, दोडामार्ग) व कमलताई परुळेकर (रा. पणदूर, ता. कुडाळ) यांचा समावेश आहे. या घटनेनंतर परिसरात तणावाचे वातावरण निर्माण झाले होते. मात्र पोलिसांनी परिस्थिती नियंत्रणात आणत पुढील तपास सुरू केला आहे.
