⚡मालवण ता.२४-:
मालवण तालुक्यातील आनंदव्हाळ – कर्लाचाव्हाळ येथील जगन्नाथ उर्फ गणेश धोंडी सडवेलकर (वय- २४) या युवकाने घराच्या परिसरात मध्यरात्री ओढणीच्या साहाय्याने गळफास लावून घेत आत्महत्या केली. ही घटना आज सकाळी उघडकीस आली आहे.
याबाबत पोलिसांनी दिलेल्या माहितीनुसार जगन्नाथ धोंडी सडवेलकर या युवकाचा गळफास घेतलेल्या अवस्थेतील मृतदेह घराच्या परिसरातील व्हरांड्यात आज सकाळी कुटुंबियांना आढळून आला. या घटनेची माहिती पोलिसांना दिल्यावर पोलीस उपनिरीक्षक एस. एस. खाडे, पोलीस कर्मचारी अनुप हिंदळेकर यांनी घटनास्थळी भेट देत माहिती घेतली. पोलिसांनी पंचनामा केल्यावर मृतदेह मालवण ग्रामीण रुग्णालयात शव विच्छेदनासाठी आणण्यात आला. अधिक तपास पोलीस निरीक्षक मारुती जगताप यांच्या मार्गदर्शनाखाली जितेंद्र पेडणेकर हे करत आहेत.
जगन्नाथ सडवेलकर हा मालवण मध्ये खाजगी कंपन्याच्या ऑनलाइन डिलिव्हरीचे काम करत होता. त्याच्या आत्महत्येमागील नेमके कारण समजू शकले नाही. मात्र, मनासारखे काम मिळत नसल्याच्या नैराश्यातून त्याने आत्महत्या केली असावी, असा प्राथमिक अंदाज वर्तविण्यात येत आहे. त्याच्या पश्चात आई, वडील, बहीण, आजी, काका असा परिवार आहे. कर्लाचाव्हाळ येथील हार्मोनियम वादक धोंडी उर्फ आपी सडवेलकर यांचा तो मुलगा होय.
