नंदकिशोर काळे:सिंधुदुर्ग जिल्ह्यातील नागरीकांना केले आवाहन…
⚡बांदा ता.०९-: सिंधुदुर्ग उपप्रादेशिक परिवहन कार्यालयाचे संगणकीय अभिलेख्यावर दुचाकी संवर्गासाठी सध्या सुरु असलेल्या एआर (AR) या मालिकेत सध्या 9673 हा नोंदणी क्रमांक सुरु असून सदरची मालिका पुढील आठवड्यात संपणार असून वाहन वितरकांना एटी (AT) ही दुचाकी नोंदणीसाठी नवीन मालिका सुरु करण्यात येणार आहे. या मालिकेतील शासन नियमानुसार निर्गमित केलेले पसंतीचे नोंदणी क्रमांक वाहन चालकांनी शुल्क भरून राखून ठेवावेत असे आवाहन सिंधुदुर्ग जिल्ह्यातील नागरीकांना उपप्रादेशिक परिवहन अधिकारी नंदकिशोर काळे यांनी
प्रसिद्धीपत्रकाद्वारे केले आहे.
पत्रकात म्हटले आहे की, सिंधुदुर्ग उप प्रादेशिक परिवहन कार्यालयाचे वाहन ४.० या संगणक प्रणालीवर दुचाकी वाहनांच्या नोंदणीसाठी सध्या सुरु असलेल्या AR या मालिकेतील अंतीम नोंदणी क्रमांक जारी केल्यानंतर AT ही नवीन मालिका सुरु करण्यात येत आहे.महाराष्ट्र मोटार वाहन नियम १९८९ च्या नियम ५४ मध्ये नवीन नोंदणी चिन्ह नेमून देण्याबाबत तरतुद विहीत करण्यात आलेली आहे. सदर नियमातील नियम अ (३) मध्ये शासनाने विनिर्दिष्ट केल्याप्रमाणे शुल्क प्रदान केल्यावर, नोंदणी चिन्हांमधून, मोटार वाहनांच्या मालकासाठी त्यांच्या पसंतीचे नोंदणी चिन्ह राखून ठेवील तसेच नियम अ (७) मध्ये विनिर्दिष्ट केलेल्या शुल्काच्या तिप्पट दराने शुल्क प्रदान केल्यावर, वाहनाच्या कोणत्याही वर्गासाठी, इतर कोणत्याही मालिकेतून नोंदणी चिन्हे नेमून देता येतील याप्रमाणे तरतुद करण्यात आलेली आहे.
सिंधुदुर्ग उप प्रादेशिक परिवहन कार्यालयात दुचाकी संवर्गासाठी सुरु होत असलेल्या AT या मालिकेतील महाराष्ट्र मोटार वाहन नियम १९८९ च्या नियम ५४-अ मध्ये राखीव ठेवण्यात आलेली नोंदणी चिन्हे तसेच अनाकर्षक नोंदणी क्रमांक विहीत केलेले शुल्क भरुन राखीव करण्यात यावेत असे आवाहन करण्यात आले आहे.
