मालवण पोलीस स्थानकात अज्ञात चोरट्यांविरोधात गुन्हा दाखल*
*⚡मालवण ता.२५-:* मालवण शहरातील बांगवाडा येथील अथर्व कॉम्प्लेक्स मधील एक फ्लॅट अज्ञात चोरट्यानी फोडून चोरीचा प्रयत्न केल्याची घटना आज उघडकीस आली असून यात चोरट्यांच्या हाती काही लागले नसल्याचे प्रथमदर्शनी दिसून आले आहे. याबाबत मालवण पोलीस स्थानकात अज्ञात चोरट्यांविरोधात गुन्हा दाखल करण्यात आला आहे. याबाबत मालवण पोलिसांनी दिलेल्या माहिती नुसार शहरातील बांगीवाडा येथे असलेल्या अथर्व कॉम्प्लेक्स मधील अक्षता चंद्रकांत तांबे (वय ५०) या काल दुपारी अडीज वाजता आपला फ्लॅट बंद करून कणकवली येथे गेल्या होत्या. त्या आज मालवणात परतल्यानंतर त्यांना अज्ञाताने फ्लॅटचे कडी कुलूप फोडल्याचे दिसून आले.त्यांनी लागलीच पोलिसांना पाचारण केल्यानंतर फ्लॅट मधील कपडे विस्कटलेले दिसून आले. तांबे यांची कोणतीही मौल्यवान वस्तू चोरीस गेल्याचे पाहणीत निष्पन्न झाले. दागिने व इतर किमती मुद्देमाल जैसे थे असल्याची माहिती तांबे यांनी पोलिसांना दिली आहे. त्यामुळे चोरीचा प्रयत्न होऊन चोरांच्या हाती काही लागलेले नाही. याबाबत मालवण पोलिस स्थानकात अक्षता तांबे यांच्या तक्रारीवरून अज्ञात चोरट्यांविरोधात गुन्हा दाखल करण्यात आला आहे. या प्रकरणी पोलिसांकडून तपास सुरू असून डॉग स्कॉड व ठसे तज्ज्ञांच्या मार्फत अधिक तपास करण्यात येत आहे, अशी माहिती पोलीस निरीक्षक सोनू ओटवणेकर यांनी दिली आहे.
