१ कोटी ७६ लाखांच्या पाच कामांचे भूमिपूजन: २८ कोटींच्या विकासकामांसाठीही प्रयत्न,रस्ते, गटारे, फुटपाथ आणि सोलर पथदीपांची कामे मार्गी;दिवाळी बाजार, पर्यटन महोत्सव आणि ‘नगराध्यक्ष आपल्या दारी’ उपक्रमाची घोषणा..
⚡कणकवली ता.१९-: कणकवली शहराच्या सर्वांगीण विकासाच्या दृष्टीने नगरपंचायतीच्या माध्यमातून विविध विकासकामे हाती घेण्यात येत असून, शहरातील पाच महत्त्वाच्या कामांचे सुमारे १ कोटी ७६ लाख रुपये खर्चाच्या निधीतून भूमिपूजन करण्यात आले. जिल्हास्तरीय नियोजनाच्या माध्यमातून ही कामे करण्यात येणार असून, शहरातील रस्ते, गटारे, फुटपाथ आणि सोलर पथदीपांच्या सुविधांना यामुळे चालना मिळणार आहे. तसेच जिल्हास्तरावर सुमारे २८ कोटी रुपयांच्या अन्य विकासकामांची यादीही देण्यात आली असून, त्यासाठी निधी उपलब्ध होण्याची अपेक्षा आहे. कणकवली नगरपंचायतीच्या नगराध्यक्ष दालनात आयोजित पत्रकार परिषदेत नगराध्यक्ष संदेश पारकर यांनी ही माहिती दिली.
कणकवली शहरातील विविध भागांमध्ये पायाभूत सुविधा मजबूत करण्यासाठी पाच कामे हाती घेण्यात आली आहेत. यामध्ये साठम घर ते वळी रस्ता रुंदीकरण व नूतनीकरणासाठी सुमारे ६५ लाख रुपये खर्च अपेक्षित आहे. कणकवली नगरपंचायत हद्दीतील गणपती साना, कांदळकर घर ते कला महाविद्यालयापर्यंत गटार बांधकामासाठी सुमारे ३० लाख रुपये खर्च करण्यात येणार आहेत.
संतोष सावंत घर ते जुना नरडवे रस्त्यावरील फुटपाथ व गटार बांधकामासाठी सुमारे २६ लाख रुपये खर्च अपेक्षित आहे. कणकवली निम्मेवाडी येथील दुखंडे घर परिसरात पाण्याशी संबंधित बांधकामासाठी सुमारे २० लाख रुपयांचे काम प्रस्तावित आहे. तसेच चौंडेश्वरी मंदिर ते रिंग रोड परिसरात फेज-१ व फेज-२ अंतर्गत सोलर पथदीप व्यवस्था उभारण्याचे कामही हाती घेण्यात आले आहे. या पाचही कामांच्या माध्यमातून शहरातील मूलभूत सुविधांमध्ये सुधारणा करण्याचा प्रयत्न असल्याचे पारकर यांनी सांगितले.
कणकवली नगरपंचायत शहरातील सर्व १७ प्रभागांमध्ये टप्प्याटप्प्याने विकासकामे राबविण्यासाठी प्रयत्नशील आहे. निधी उपलब्ध झाल्यानंतर संबंधित कामांचे ठराव, निविदा प्रक्रिया आणि वर्क ऑर्डर पूर्ण करून प्रत्यक्ष कामांना सुरुवात करण्यात येईल. शहराचा सर्वांगीण विकास साधण्यासाठी वेगवेगळ्या योजनांच्या माध्यमातून सातत्याने प्रयत्न सुरू आहेत.
गेल्या आठ महिन्यांमध्ये नगरपंचायतीच्या सभांमध्ये विविध विकासकामांबाबत ठराव घेण्यात आले, चर्चा करण्यात आली आणि त्यानुसार कामे पुढे नेण्यात आली. शहरातील काँक्रिटीकरणाच्या रस्त्यांसाठी सुमारे साडेअकरा कोटी रुपये आणण्यात आले असून, प्रसाधनगृहांच्या कामांसाठी दीड कोटी रुपये उपलब्ध करण्यात आले आहेत. याशिवाय शहरातील विविध ठिकाणी सुशोभीकरणाची कामेही हाती घेण्यात आली आहेत.
जिल्हास्तरावर यापूर्वी सुमारे २२ कोटी रुपये आणि नव्याने आणखी सहा कोटी रुपये अशा एकूण सुमारे २८ कोटी रुपयांच्या विकासकामांची यादी देण्यात आली आहे. या कामांसाठी लवकरच निधी उपलब्ध होईल, अशी अपेक्षा नगराध्यक्ष संदेश पारकर यांनी व्यक्त केली. शहरातील विविध भागांमध्ये प्रलंबित असलेले प्रश्न आणि आवश्यक विकासकामे लक्षात घेऊन उपलब्ध निधी संबंधित कामांवर खर्च करण्यात येईल, असे त्यांनी स्पष्ट केले.
नगरपंचायतीने यापूर्वी रद्द केलेल्या २१ कामांच्या निविदांबाबतची प्रक्रियाही अंतिम टप्प्यात असल्याचे त्यांनी सांगितले. यासंदर्भात जिल्हाधिकाऱ्यांकडून निर्णय झाल्यानंतर ही कामेही सुरू करण्याच्या दृष्टीने प्रयत्न करण्यात येतील.
२१ डिसेंबर रोजी नगरपंचायतीच्या सत्तेची वर्षपूर्ती होणार आहे. जनतेने विश्वासाने दिलेल्या जनादेशानंतर पहिल्या वर्षात घेण्यात आलेल्या निर्णयांचा आणि सुरू केलेल्या विकासकामांचा आढावा घेण्यासाठी वर्षपूर्तीचा कार्यक्रम आयोजित करण्यात येणार असल्याचे पारकर यांनी सांगितले.
शहराच्या विकासाची जबाबदारी स्वीकारून नगरपंचायतीचे प्रशासन, नगरसेवक, नगरसेविका, उपनगराध्यक्ष आणि सर्व संबंधित घटक एकत्रितपणे काम करत आहेत. विकासकामांच्या प्रक्रियेत विरोधी पक्षाचे सहकार्यही महत्त्वाचे असून, शहराच्या प्रगतीसाठी सर्वांनी एकत्र येण्याची गरज असल्याचे त्यांनी नमूद केले.
कणकवली शहरात दिवाळीनिमित्त २ नोव्हेंबर ते ७ नोव्हेंबर या कालावधीत आप्पासाहेब पटवर्धन चौक येथे भव्य दिवाळी बाजार आयोजित करण्यात येणार आहे. या बाजारात सुमारे ३० स्टॉल सहभागी होणार असून, बाजाराच्या माध्यमातून ग्राहकांना विविध वस्तूंची खरेदी करण्याची संधी मिळणार आहे. त्याचबरोबर स्थानिक उद्योजक आणि व्यावसायिकांना आपली उत्पादने विक्रीसाठी उपलब्ध करून देण्याचे व्यासपीठ मिळणार आहे.
दिवाळी बाजारामध्ये स्टॉल लावू इच्छिणाऱ्या व्यावसायिकांनी उपनगराध्यक्ष सुशांत नाईक, नगरसेवक लुकेश कांबळे, सर्व नगरसेवक-नगरसेविका आणि नगरपंचायत प्रशासनाशी तातडीने संपर्क साधावा, असे आवाहन पारकर यांनी केले. या बाजाराला शहरासह तालुक्यातील आणि जिल्ह्यातील ग्राहकांचा चांगला प्रतिसाद मिळेल, असा विश्वासही त्यांनी व्यक्त केला.
कणकवली शहरातील सांस्कृतिक आणि पर्यटनविषयक उपक्रमांना चालना देण्यासाठी यंदा पर्यटन महोत्सव आयोजित करण्याची भूमिका नगरपंचायतीने घेतली आहे. हा महोत्सव डिसेंबरमध्ये घ्यायचा की मे महिन्यात, याबाबत नियोजन करून निर्णय घेण्यात येणार आहे. कणकवलीला सांस्कृतिकदृष्ट्या महत्त्वाचे स्थान असून, दर्जेदार पर्यटन महोत्सवाच्या माध्यमातून स्थानिक कलाकारांना आणि या क्षेत्रातील विविध घटकांना व्यासपीठ उपलब्ध करून देण्याचा प्रयत्न राहणार असल्याचे पारकर यांनी सांगितले.
शहरातील नागरिकांच्या समस्या थेट जाणून घेण्यासाठी ‘नगराध्यक्ष आपल्या दारी’ ही मोहीम राबविण्याचे नियोजन करण्यात येत आहे. या उपक्रमांतर्गत प्रभागनिहाय नागरिकांशी संवाद साधून त्यांच्या समस्या, मूलभूत सुविधांबाबतच्या तक्रारी आणि विकासाच्या अपेक्षा जाणून घेण्यात येणार आहेत. नागरिकांना अपेक्षित असलेली विकासकामे समजून घेऊन आगामी पाच वर्षांच्या कालावधीत जास्तीत जास्त कामे पूर्ण करण्याचा प्रयत्न केला जाईल, असे पारकर यांनी सांगितले.
नागरिकांना रस्ते, वीज, पाणी, आरोग्य आणि शिक्षण या मूलभूत सुविधांसोबतच शहराच्या शाश्वत विकासासाठी आवश्यक असलेल्या प्रकल्पांची पूर्तता करण्यावर भर देण्यात येणार आहे. नागरिकांना काही अडचणी किंवा गैरसोयी जाणवत असल्यास त्यांनी थेट नगरपंचायतीशी संवाद साधावा. नागरिकांच्या प्रश्नांचा प्राधान्याने विचार करून ते सोडविण्यासाठी प्रयत्न करण्यात येतील, असेही त्यांनी स्पष्ट केले.
कणकवली शहरात आधुनिक क्रीडांगण, व्यापारी संकुल, सुंदर गार्डन आणि नाट्यगृह उभारण्याचे उद्दिष्ट नगरपंचायतीने ठेवले आहे. त्याचबरोबर नळपाणी योजना, भुयारी गटार योजना आणि रेन हार्वेस्टिंगसारख्या महत्त्वाच्या प्रकल्पांसाठी प्रस्ताव आणि सविस्तर प्रकल्प अहवाल (डीपीआर) तयार करण्याचे काम सुरू असल्याची माहिती पारकर यांनी दिली.
कणकवली शहरातील महामार्गावरील उड्डाणपुलाखालील सुमारे दीड ते पावणेदोन किलोमीटरच्या परिसराच्या विकासासाठीही डीपीआर तयार करण्यात आला आहे. या प्रकल्पासाठी जवळपास ३० कोटी रुपये खर्च अपेक्षित असून, निधीच्या उपलब्धतेनुसार या संपूर्ण परिसराचा विविध स्तरांवर विकास करण्यात येणार आहे. या भागात क्रीडा आणि कला क्षेत्रासह भालचंद्र महाराज आणि आप्पासाहेब पटवर्धन यांच्याशी संबंधित बाबींचाही विचार करून नियोजन करण्यात आल्याचे त्यांनी सांगितले.
सध्या कणकवली शहरासह सिंधुदुर्ग जिल्ह्यात नवरात्रोत्सवाचा उत्साह असून, दसऱ्याच्या पार्श्वभूमीवर नगराध्यक्ष संदेश पारकर यांनी शहरवासीय आणि जिल्हावासीयांना शुभेच्छा दिल्या. आगामी दिवाळी सणाच्या शुभेच्छाही त्यांनी व्यक्त केल्या. सण-उत्सवांच्या या मंगलमय वातावरणात नागरिकांच्या मनोकामना पूर्ण व्हाव्यात आणि सर्वांच्या जीवनात सुख, समाधान व समृद्धी नांदावी, अशी प्रार्थना त्यांनी देवीच्या चरणी केली.
कणकवली शहराच्या विकासासाठी राज्य, केंद्र आणि जिल्हास्तरावरून आवश्यक सहकार्य मिळविण्याचे प्रयत्न सुरू आहेत. शहराच्या विकासाची चळवळ अधिक व्यापक करण्यासाठी नागरिक, विरोधी पक्ष, नगरपंचायत प्रशासन, नगरसेवक-नगरसेविका आणि पत्रकारांचे सहकार्य आवश्यक असल्याचे सांगत, सर्वांच्या सहभागातून कणकवली शहराचा सर्वांगीण विकास साधण्याचा निर्धार पारकर यांनी व्यक्त केला.
या पत्रकार परिषदेला उपनगराध्यक्ष सुशांत नाईक, नगरसेवक संकेत नाईक, जयेश धुमाळे, सुमेधा अंधारी, जाई मुरकर, सत्यजित पारकर, लुकेश कांबळे आदी उपस्थित होते.