कर्मचाऱ्यांना योग्य ती समज द्या: अन्यथा शिवसेना स्टाईल आम्ही त्यांच्यावर कारवाई करू; आगार
प्रमुखांना इशारा..
⚡सावंतवाडी ता.०४-: एसटी महामंडळाच्या कर्मचाऱ्यांसाठी गणवेश (ड्रेस कोड) बंधनकारक असतानाही अनेक कर्मचारी त्याचे पालन करत नसल्याने आता शिवसेना नेते संजू परब यांनी याविरोधात आक्रमक पवित्रा घेतला आहे. जर यापुढेही कर्मचारी गणवेशात दिसले नाहीत, तर शिवसेना आपल्या पद्धतीने त्यांच्यावर कारवाई करेल, असा स्पष्ट इशारा परब यांनी आज येथील आगार प्रमुखांना दिला आहे.
आज सकाळी, संजू परब यांनी येथील एसटी आगाराला भेट दिली.
यावेळी त्यांनी आगार प्रमुखांसोबत विविध समस्यांवर चर्चा केली आणि प्रवाशांना भेडसावणाऱ्या अडचणींबाबतही त्यांचे लक्ष वेधले. याच भेटी दरम्यान, त्यांनी एसटी कर्मचाऱ्यांच्या गणवेशाच्या नियमांच्या पालनाबाबत आगार प्रमुखांना जाब विचारला. “कर्मचारी गणवेशात का नसतात? महामंडळाचे नियम असतानाही त्याची अंमलबजावणी का होत नाही?” असे प्रश्न त्यांनी उपस्थित केले.
यावर, आगार प्रमुखांनी कर्मचाऱ्यांना लवकरच योग्य ती समज दिली जाईल आणि गणवेश नियमांचे पालन करण्याबाबत सूचना दिल्या जातील, असे आश्वासन दिले. मात्र, आगार प्रमुखांच्या या आश्वासनानंतरही संजू परब यांनी आपला आक्रमक पवित्रा कायम ठेवला. “आम्ही पाहतोय की, अनेकदा कर्मचारी गणवेशाशिवायच ड्युटीवर असतात. यामुळे महामंडळाची प्रतिमा मलिन होते आणि शिस्तीचा अभाव दिसतो,” असे परब म्हणाले.
यापुढेही जर कोणत्याही कर्मचाऱ्याने गणवेश नियमाचे उल्लंघन केले आणि तो गणवेशाशिवाय दिसला, तर शिवसेना आपल्या पद्धतीने, म्हणजे जनआंदोलनाच्या माध्यमातून किंवा अन्य योग्य मार्गाने, त्याच्यावर ‘बंदोबस्त’ करेल, असा अंतिम इशारा परब यांनी दिला. त्यांच्या या भूमिकेमुळे एसटी कर्मचाऱ्यांचे दणाणले आहेत.
यावेळी परीक्षित मांजरेकर, महिला शहर प्रमुख भारती मोरे, विनोद सावंत, क्लटस फर्नांडिस, हेमंत बांदेकर साक्षी गवस, आदी उपस्थित होते
