⚡मालवण ता२९-: बॅ. नाथ पै सेवागण, मालवणतर्फे युनिसेफ, मुंबई आणि पर्यावरण शिक्षण केंद्र, पुणे यांच्या संयुक्त विद्यमाने महायुथ फॉर क्लायमेट अॅक्शन ही एक दिवसीय कार्यशाळा आयोजित करण्यात आली होती. पर्यावरणात होणारे बदल आणि त्याचा हवा, पाणी, निसर्ग, जैवविविधता आणि प्रामुख्याने आरोग्यावर होणारा परिणाम लक्षात घेता भविष्यात फार मोठी गंभीर समस्या आपल्या पुढे उभी राहणार आहे, यासाठी युवा पिढीला जागृत करून पर्यावरणातील या घटकांचे संवर्धन कसे करता येईल याबाबत युनिसेफच्या कन्सल्टंट प्रियांका शेंगडे व पर्यावरण शिक्षण केंद्र, पुणे कार्यशाळा प्रमुख अवधूत अभ्यंकर यांनी यावेळी मार्गदर्शन केले.
यावेळी मनोजकुमार गिरकर यांनी कार्यक्रमाचे स्वरूप सांगितले. संस्थेचे कार्यवाह लक्ष्मीकांत खोबरेकर यांनी स्वागत केले. यावेळी भारतीय संविधानाच्या प्रास्ताविकेचे वाचन लक्ष्मीकांत खोबरेकर यांनी केले. यावेळी टीम मेंबर्स कृणाल जयस्वाल, मंगेश निकम एमवायसीएचे मालवण प्रतिनिधी संजय वराडकर, सेवांगणचे व्यवस्थापक संजय आचरेकर, संस्थेच्या रिटा पिंटो आदी प्रमुख उपस्थित होते.
मालवणमध्ये येणारे पर्यटक आणि त्यांच्या माध्यमातून होणारे धूळ, धूर, बेस्ट प्लास्टिक पिशव्या, बॉटल यांचे प्रदूषण, कचऱ्याचे व्यवस्थापन योग्य पद्धतीने होत नसल्याने उद्भवणाऱ्या गंभीर समस्या या सर्वांचे विचारमंथन कार्यशाळेत करण्यात आले. पर्यावरणाचे संरक्षण आणि संवर्धन करण्यासाठी शाळा कॉलेजमधून पर्यावरण या विषयाकडे शिक्षक आणि विद्यार्थी यांनी कटाक्षाने लक्ष देणे आवश्यक आहे. या संदर्भात चर्चा करून, बरेच नवीन मुद्दे समोर आले आहेत. या अनुषंगाने आपण सर्वांनी काम करण्यास जोमाने सुरूवात करूया, असा एक सूर या चर्चेतून उमटला. गटचर्चा करून यातून चर्चिलेल्या मुद्यावर सविस्तर माहिती देण्यात आली.
यावेळी यूनिसेफसारख्या जागतिक संस्थेने सन्मानित केलेल्या आणि यावर्षीचा तरुण भारत सन्मान पुरस्कार जाहीर झालेल्या कु. मेगल डिसोझा या विद्यार्थिनीचा सेवांगणतर्फे सत्कार करण्यात आला. या कार्यशाळेत भंडारी आणि टोपीवाला ज्युनिअर कॉलेजचे विद्यार्थी आणि चळवळीतील कार्यकर्ते या कार्यक्रमास उपस्थित होते. यावेळी बालविकास प्रकल्पाच्या वैष्णवी आचरेकर, रुचिरा चिंदरकर तारी उपस्थित होत्या.
