सुधांशू शिरसाट दक्षिण आफ्रिकेत बनला पायलट:बालपणीचे स्वप्न केले साकार; वडील अजय शिरसाट यांच्या साथीने यशाला गवसणी, मायभूमीत कौतुकाचा वर्षाव..
⚡कणकवली ता.१८-: जिद्द, मेहनत आणि स्वप्न पूर्ण करण्याची प्रबळ इच्छाशक्ती असेल, तर यशाचे आकाश गाठता येते, हे कणकवली तालुक्यातील साकेडी गावच्या सुपुत्राने सिद्ध करून दाखवले आहे. सुधांशू अजय शिरसाट याने दक्षिण आफ्रिकेत पायलटची परीक्षा उत्तीर्ण करत आपल्या बालपणीच्या स्वप्नाला सत्यात उतरवले आहे. त्याच्या या यशामुळे साकेडी गावाची मान उंचावली असून, गावातून त्याच्यावर अभिनंदनाचा वर्षाव होत आहे.
सुधांशू याला सुरुवातीपासूनच विमानाचा पायलट बनण्याची ओढ होती. आकाशात विमान उडविण्याचे स्वप्न उराशी बाळगून त्याने या दिशेने वाटचाल सुरू केली. मुलाचे स्वप्न पूर्ण करण्यासाठी वडील अजय शिरसाट यांनी त्याला मोलाची साथ दिली. वडिलांच्या प्रोत्साहनामुळे आणि स्वतःच्या मेहनतीच्या जोरावर सुधांशूने पायलट होण्याच्या ध्येयासाठी आवश्यक प्रशिक्षण घेण्याचा निर्णय घेतला.
पायलट होण्याच्या ध्येयाने सुधांशूने दक्षिण आफ्रिकेत दोन वर्षे प्रशिक्षण घेतले. या प्रशिक्षणादरम्यान त्याने सातत्याने मेहनत घेतली. अखेर अलीकडेच त्याने पायलटची परीक्षा उत्तीर्ण केली आणि आपल्या स्वप्नपूर्तीच्या दिशेने महत्त्वाचे पाऊल टाकले. शुक्रवारी सुधांशू दक्षिण आफ्रिकेतून मुंबईत दाखल झाला. त्याच्या या यशाने शिरसाट कुटुंबीयांचा आनंद द्विगुणित झाला आहे.
सुधांशू शिरसाट हा कणकवलीचे माजी सभापती संजय शिरसाट यांचा नातू आहे. सुधांशूचे शिक्षण मुंबईत झाले आहे. आपल्या कुटुंबीयांच्या पाठबळावर आणि स्वतःच्या जिद्दीवर त्याने परदेशात पायलटचे प्रशिक्षण पूर्ण करून परीक्षेत यश मिळवले. त्याच्या या यशाची माहिती मिळताच साकेडी गावात आनंदाचे वातावरण निर्माण झाले असून, ग्रामस्थांकडून त्याचे कौतुक आणि अभिनंदन केले जात आहे.
गावातील तरुणाने परदेशात पायलटची परीक्षा उत्तीर्ण होऊन मिळवलेले यश साकेडी गावासाठी अभिमानाची बाब ठरले आहे. सुधांशूच्या यशातून स्वप्न पाहण्यासोबतच ते पूर्ण करण्यासाठी मेहनत घेण्याची प्रेरणा तरुणाईला मिळत आहे. बालपणी पाहिलेले स्वप्न प्रत्यक्षात उतरवणाऱ्या सुधांशू शिरसाट याच्या यशाचे साकेडी गावातून कौतुक होत असून, त्याच्या पुढील वाटचालीसाठी शुभेच्छा दिल्या जात आहेत.