१६ वनराई बंधाऱ्यांची उभारणी पूर्ण:तुळसुली, अणाव, मांडकुली व केरवडे भोईवाडी येथे बंधारे..
⚡कुडाळ ता.१४-: पावसाचे वाहून जाणारे पाणी अडवून ते जमिनीत मुरविणे, भूजलपातळी वाढविणे आणि उन्हाळ्यातील पाणीटंचाईवर मात करण्याच्या उद्देशाने राबविण्यात येणाऱ्या जलसंवर्धन मोहिमेंतर्गत रोटरी क्लब ऑफ कुडाळ, संविता आश्रम पणदूर आणि ग्रामपंचायत तुळसुली, तर्फ माणगाव यांच्या संयुक्त विद्यमाने आतापर्यंत १६ वनराई बंधाऱ्यांची उभारणी पूर्ण करण्यात आली आहे.
यामध्ये तुळसुली येथे १२, अणाव येथे तीन, तर मांडकुली आणि केरवडे भोईवाडी परिसरात मिळून एका वनराई बंधाऱ्याचा समावेश आहे. या मोहिमेअंतर्गत तुळसुली येथील बुडक्याची वाडी, भाटी येथे नुकताच वनराई बंधारा उभारण्यात आला.
पावसाळ्यात वाहून जाणारे पाणी अडवून त्याचा उपयोग शेतीसाठी तसेच परिसरातील पाण्याची उपलब्धता वाढविण्यासाठी व्हावा, हा या उपक्रमामागील मुख्य उद्देश आहे. वनराई बंधाऱ्यांमुळे पाणी जमिनीत मुरण्यास मदत होऊन भूजलपातळी सुधारण्यास हातभार लागू शकतो. जलसंवर्धनाच्या या उपक्रमातून पाण्याचे महत्त्व अधोरेखित करत ग्रामस्थांमध्येही जलजागृती निर्माण करण्याचा प्रयत्न केला जात आहे.
या बंधारा उभारणीप्रसंगी रोटरी क्लब ऑफ कुडाळचे अध्यक्ष मकरंद नाईक, तुळसुलीचे सरपंच जयराम, ग्रामसेविका सावंत मॅडम, प्रथमेश वारंग, संविता आश्रम पणदूरचे शैलेंद्र कदम व आश्रमाचे सहकारी, तुळसुली येथील ग्रामस्थ तसेच पत्रकार विनायक वंजारे उपस्थित होते.
सामाजिक संस्था, ग्रामपंचायत आणि ग्रामस्थ यांच्या एकत्रित सहभागातून जलसंवर्धनाचे कार्य अधिक प्रभावीपणे करता येते, हे या उपक्रमातून स्पष्ट होत आहे. भविष्यात पाणीटंचाईची तीव्रता कमी करण्यासाठी आणि जलसुरक्षित गावांच्या निर्मितीसाठी अशा उपक्रमांना अधिकाधिक लोकसहभाग मिळणे आवश्यक आहे.
१६ वनराई बंधाऱ्यांची उभारणी पूर्ण करून रोटरी क्लब ऑफ कुडाळ आणि सहकारी संस्थांनी जलसंवर्धनाच्या दिशेने महत्त्वपूर्ण पाऊल टाकले आहे.