मालवण दि (प्रतिनिधी)
मालवण शहरातील धुरीवाडा साईनगर येथील साई मंदिराचा ३२ वा वर्धापन दिन महोत्सव साजरा होत असून काल सायंकाळी मालवण शहरातून साई पादुका व प्रतिमा पालखी मिरवणूक वाजतगाजत काढण्यात आली. यात मोठ्या संख्येने भाविक सहभागी झाले होते. यावेळी सादर झालेले म्हापण येथील चपई नृत्य सर्वांचे आकर्षण ठरले. या उत्सवात उद्या दि. ७ डिसेंबर रोजी दत्त जयंती, सत्यनारायण महापूजा व महाप्रसाद भंडारा आदी कार्यक्रम होणार आहेत.
धुरीवाडा येथील साई मंदिराच्या वर्धापन दिन उत्सवास दि २८ नोव्हेंबर पासून सुरुवात झाली. २८रोजी साई सगुण पूजा व साई सतुचरित्र पारायण प्रारंभ झाला. ४ डिसेंबर रोजी पारंपरिक डबलबारी भजन सामना वडचीदेवी भजन मंडळ, लिंगडाळचे बुवा संदीप लोके आणि गावदेवी भजन मंडळ, डोंबिवलीचे बुवा संजय पवार यांच्यात रंगला. काल ५ रोजी प्रातः पूजा, साई दुग्धाभिषेक होऊन सायंकाळी साई पादुका पालखी मिरवणूक संपन्न झाली. उद्या ७ रोजी दत्त जयंती उत्सव होणार असून यानिमित्त दुग्धाभिषेक, सत्यनारायण महापूजा, महाप्रसाद भंडारा होणार आहे. तर सायंकाळी साईंची महाआरती व रात्री अमृतनाथ दशावतार नाट्य मंडळ, म्हापणचे नवीन नाट्यपुष्प ‘मोरया गोसावी’ हा नाट्यप्रयोग होणार आहे. भाविकांनी लाभ घ्यावा, असे आवाहन करण्यात आले आहे.
