सिंधुदुर्ग एलसीबी पथकाची दमदार कारवाई..
⚡कणकवली ता.१३-: कणकवली व कुडाळ परिसरात जबरीने गळ्यातील सोनसाखळी खेचून चोरी करणाऱ्या टोळीतील एका सराईत आरोपीस स्थानिक गुन्हे अन्वेषण शाखेच्या पथकाने अमरावती जिल्ह्यातून शिताफीने ताब्यात घेतले आहे. रोहन मोहन हुनकर (वय 23, रा. येरला, ता. मोर्शी, जि. अमरावती) असे ताब्यात घेण्यात आलेल्या आरोपीचे नाव आहे.
कणकवली पोलीस ठाणे तसेच कुडाळ पोलीस ठाणे येथे भा.न्या.सं. कलम 304(2), 3(5) अन्वये जबरीने गळ्यातील सोनसाखळी चोरी केल्याप्रकरणी गुन्हे दाखल आहेत. या गुन्ह्यांचा समांतर तपास स्थानिक गुन्हे अन्वेषण शाखेकडून सुरू होता.
तपासादरम्यान पोलिसांना मिळालेल्या गोपनीय माहितीनुसार तसेच मानवी कौशल्य व तांत्रिक तपासाच्या आधारे ११ मे २०२६ रोजी अमरावती जिल्ह्यातील मोर्शी तालुक्यात सापळा रचण्यात आला. यावेळी संशयित रोहन हुनकर यास पोलिसांनी ताब्यात घेतले.
चौकशीदरम्यान आरोपीने आपल्या साथीदारासह मोटारसायकलवर येऊन सोनसाखळी चोरी केल्याची कबुली दिल्याची माहिती पोलिसांकडून देण्यात आली.
दरम्यान, आरोपी रोहन हुनकर हा सराईत गुन्हेगार असून त्याच्याविरुद्ध वर्धा, अकोला आणि अमरावती येथे सोनसाखळी चोरीचे अनेक गुन्हे दाखल असल्याचे उघड झाले आहे. तसेच कोल्हापूर, सांगली आणि अमरावती येथेही तो पाहिजे आरोपी असल्याची माहिती तपासात समोर आली आहे.
आरोपीची वैद्यकीय तपासणी करून पुढील तपासासाठी त्यास कणकवली पोलीस ठाण्यात हजर करण्यात आले आहे. या प्रकरणाचा पुढील तपास सुरू आहे.
ही कारवाई पोलीस अधीक्षक मोहन दहिकर व अप्पर पोलीस अधीक्षक कु. नयोमी साटम यांच्या सूचनेनुसार पोलीस निरीक्षक प्रवीण कोल्हे यांच्या मार्गदर्शनाखाली करण्यात आली. स्थानिक गुन्हे अन्वेषण शाखेचे पोलीस उपनिरीक्षक अनिल हाडळ, सहाय्यक पोलीस उपनिरीक्षक सुरेश राठोड, पोलीस हवालदार जँक्शन घोन्सालवीस तसेच पोलीस अंमलदार अमर कांडर यांच्या पथकाने ही कारवाई यशस्वीरीत्या पार पाडली.
