सावंतवाडीतील युवक ताब्यात;२७ लाख ५७ हजार ६०० रूपये मुद्देमाल जप्त
बांदा
गोव्यातून कोल्हापूरच्या दिशेने ट्रक मधून होणाऱ्या बेकायदा दारू वाहतुकी विरोधात राज्य उत्पादन शुल्क खात्याच्या कोल्हापूर भरारी पथकाने गगनबावडा येथे कारवाई करत १८ लाख ५७ हजार ६०० रुपये किमतीच्या दारुसह एकूण २७ लाख ५७ हजार ६०० रुपये किमतीचा मुद्देमाल जप्त केला. याप्रकरणी चालक अक्षय अशोक शिरवणकर (वय ३१, रा. सावंतवाडी) यांचेवर अटकेची कारवाई करण्यात आली.
. याबाबत अधिक माहिती अशी की, गोव्याहून कोल्हापूरच्या दिशेने ट्रक मधून मोठ्या प्रमाणात बेकायदा दारू वाहतूक होणार असल्याची माहिती भरारी पथकाला मिळाली होती. त्यानुसार कोल्हापूर विभागीय उपायुक्त डॉ. बी. एच. तडवी यांच्या मार्गदर्शनाखाली निरीक्षक एस जे डेरे, दुय्यम निरीक्षक आर जी येवलूजे, एस एस गोंदकर, कॉन्स्टेबल विलास पवार, सुशांत बनसोडे, अमोल यादव, दीपक कापसे यांच्या पथकाने गगनबावडा येथे सापळा रचला होता.
याठिकाणी कोल्हापूरच्या दिशेने जाणारा ट्रक (एमएच ०४ एचवाय ८३४४) तपासणीसाठी थांबविण्यात आला. ट्रकच्या मागील हौद्यात कागदी पुठ्ठ्याच्या खोक्यात गोवा बनवटीच्या विविध ब्रँडचे १८० मिली मापाच्या बारा हजार सिलबंद बॉटल असे एकूण २०० खोके जप्त करण्यात आले. पथकाने १८ लाख ५७ हजार ६०० रुपये किमतीची दारू व ९ लाख रुपये किमतीचा ट्रक जप्त केला. अधिक तपास कोल्हापूर विभागीय भरारी पथकाचे दुय्यम निरीक्षक आर जी येवलूजे करत आहेत.
