*⚡वेंगुर्ला ता.२४-:* स्वातंत्र्याचा अमृत महोत्सव कार्यक्रमनिमित्त जिल्ह्यातील गटविकास अधिकारी व अभियंता यांनी वेंगुर्ला नगरपरिषदच्या स्वच्छ भारत पर्यटन स्थळाला भेट दिली. यावेळी अधिका-यांनी येथील प्लांटबाबत माहिती घेत प्रकल्पाबाबत समाधान व्यक्त केले.
जिल्हा परिषद सिंधुदुर्ग व पंचायत समिती वेंगुर्ला यांच्या संयुक्त विद्यमाने जलजीवन मिशन व स्वच्छ भारत मिशन (ग्रामिण) अंतर्गत स्वातंत्र्याचा अमृत महोत्सवानिमित्त जलजीवन मिशन आणि सांडपाणी घनकचरा व्यवस्थापन यावर वेंगुर्ला येथील प्रादेशिक फळ संशोधन केंद्राच्या सभागृहात दोन दिवशीय जिल्हास्तरीय निवासी कार्यशाळा संपन्न झाली. या दरम्यान पदाधिकारी यांनी वेंगुर्ला नगरपरिषदेच्या स्वच्छ भारत पर्यटन स्थळाला भेटदेऊन माहिती घेतली. यावेळी वेंगुर्ला नगरपरिषदेचे अभियंता सचिन काकड यांनी घनकचरा व्यवस्थापन व सांडपाणी व्यवस्थापन याबाबत माहिती दिली व मार्गदर्शन केले. कचरा वर्गिकरण, कच-याच्या संकलन पद्धती, ओला-सुका कच-यावरील प्रक्रिया याबाबत विस्तृत माहिती दिली. यावेळी अधिका-यांनी येथील प्लांटबाबत माहिती घेत येथील प्रकल्पाबाबत समाधान व्यक्त केले.
यावेळी उपमुख्य कार्यकारी अधिकारी (पाणी व स्वच्छता) विनायक ठाकूर, ग्रामीण पाणी पुरवठा कार्यकारी अभियंता नितीन उपरेलू, पुणे महानगरपालिकेचे सेवानिवृत्त अधिक्षक अभियंता नरेंद्र साळुंखे, तंत्र अधिकारी परीक्षित चितोडे, पुणे महानगरपालीकेचे कार्यकारी अभियंता रविंद्र मुळे, वेंगुर्ला गटविकास अधिकारी उमा पाटील, ग्रामपंचायत विस्तार अधिकारी संदेश परब, ग्रा.पा.पु.शाखा अभियंता प्रफुल्लकुमार शिंदे, जिल्हयातील सर्व पंचायत समितीचे गटविकास अधिकारी, सहाय्यक गटविकास अधिकारी, अभियंता, विस्तार अधिकारी, गट समन्वयक, समुह समन्वयक, संस्था प्रतिनिधी, पं. स.स्तरावरील कर्मचारी, गटसंचालन केंद्राचे कर्मचारी आदी उपस्थित होते. दरम्यान या कार्यशाळेत दुस-या दिवशी उप मुख्य कार्यकारी अधिकारी (पाणी व स्वच्छता विभाग) विनायक ठाकूर यांनी जलजीवन मिशन ९० दिवस कार्यक्रम, जलजीवन मिशन अंमलबजावणी याबाबत तसेच स्वच्छ भारत मिशन १०० दिवस कार्यक्रम याबाबत मार्गदर्शन केले. मालवण गटविकास अधिकारी जयेंद्र जाधव यांनी पाणी व स्वच्छता या बाबींवर मार्गदर्शन केले. कार्यक्रमाचे प्रास्ताविक मालवण कृषी अधिकारी संजय गोसावी यांनी, आभार विनायक ठाकूर यांनी मानले. पं.स.गटविकास अधिकारी उमा पाटील यांनी कार्यशाळा व कार्यक्रमाचे योग्य नियोजन केले. यावेळी वेंगुर्ला पंचायत समितीचे उत्तम सहकार्य लाभले.
